June ni 16, 2023 (Zirtawpni) chawhnu dar 2:00 khan Presbyterian Hindi Bible School (PHBS) te chuan Bawngkawn Kohhran Hall-ah Graduation Day vawi 70-na an hmang.
Inkhawm hi Rev. Zochhuanmawia, Principal-in a kaihruai a, inlawmna leh inhmelhriattirna a nei nghal a, Upa Lalthahluna Ralte, Synod Mission Board Coordinator-in Zirlai ti tha te hnenah Certificate a hlan a, Rev. R. Lalhmingsanga, Synod Mission Board Secretary-in Thuchah sawiin zirlaite Pathian hnenah a hlan a. Synod Mission Choir leh Aizawl West II, Masihi Sangati Area Choir te an zai bawk. Upa R. Zodingliana, BEC Member-in zirlai chhuakte tawngtaisakna hun a hmang a, Pu Lalvena Hnamte-in lawmthu sawiin Rev. P.C. Rohliran malsawmnain inkhawm a tin a ni.
Presbyterian Hindi Bible School, Bawngkawn, Aizawl hi Mizoram Synod Mission Board chhunga hnamdang ringtharte rinna kawnga tihnghehna tura a din a ni a. August ni 24, 1990 khan hawn a ni a, September ni 15, 1990-ah zirlai mi 20 nen class tan a ni. Hun kal zelah Synod chuan India ram hmun hrang hrangah Mission Field a hawng ta zel a; chuvangin, State hrang hrang leh ram pawn - Nepal leh Bhutan atangte pawhin zirlai an lo kal thin a. A din tan kum 1990 atanga thla thum course ni thin kha kum 1998 atangin thla ruk course-a tih sei a ni a, kum khatah batch hnih neih thin a ni.
Kum 2009 atangin Synod-in a rel angin Certificate of Theology (C.Th.) ah upgrade a ni a, a din tirh atanga batch 70-na thleng hian zirlai 1787 (mipa 1375 leh hmeichhia 412) an awm tawh a, tun tumah hian zirlai 24-in tha takin an zirchhuak a ni.