HEALTH SUNDAY & HOSPITAL SUNDAY 2023
June 30, 2023 | NEWS
July 2, 2023 (Pathianni) hi Health Sunday & Hospital Sunday (Damdawi In Pathianni) a ni. Mizoram Presbyterian Kohhran chuan Hospital Sunday hi kum 1928 atangin a hmang tan a, kum 1981 atangin July thla Pathianni hmasa ber hi ni bik atan hman a ni.
Kum 1985 Synod Inkhawmpui thu angin 1988 atang khan January Pathianni hnuhnung ber chu Phâr Pathianni (Leprosy Sunday) atan hman thin a ni a. Kum 2004 Synod chuan phâr pual chauh ni lovin natna dangte pawh huamin 'Health Sunday' tiin a thlâk ta a ni. Kum 2006 atangin Health Sunday hi hman tan a ni. Bial KTP Inkhâwmpui nen a inrual chang a awm avângin February Pathianni vawi thumnaah hman thin a ni ta a. Health Sunday-ah hian Hriselna lam thupui chi hrang hrang zir thin a ni a, kumin 2023 hian "Upate natna leh a enkawl dan" tih kan zir dawn a ni.
Kum 2008 Synod-in "Health Sunday leh Hospital Sunday hi Pathianni vawi khatah a ruala hman ni se" tia a rel angin kum 2010 atangin Health Sunday leh Hospital Sunday hi a rualin ni khatah hman a ni ta a ni.
Kumin 2023 hian Health Sunday pualin chawhnuah hun hman a ni ang a. Zanah Hospital Sunday puala hun hman a ni ang a, thawhlawm lak khawm a ni bawk ang. Thawhlawm chu Synod Hospital Charity Fund pual a ni ang a, Bial Treasurer kaltlangin Synod Office-ah theh luh tur a ni.
Kumin Health Sunday & Hospital Sunday atan hetiang hian programme duan a ni:
Chawhnu Inkhâwm : Health Sunday Pual
Thupui : Upate natna leh a enkawl dan
Zan Inkhâwm : Hospital Sunday Pual
Thupui : Natna tinreng tidamtu Isua
Synod 2022 report-a a lan danin tun dinhmuna Synod Hospital, Durtlang leh John Williams Hospital, Lunglei-a thawktu awm dan chu hetiang hi a ni :
Synod Hospital, Durtlang:
Doctor - 39
Nursing & College Staff - 220
Para Medical Staff - 34
Thawktu dang - 197
Thawktu zawng zawng - 490
John Williams Hospital, Lunglei:
Doctor - 4
Nursing Staff - 22
Para Medical Staff - 9
Thawktu dang - 27
Thawktu zawng zawng - 62
Health Sunday thupui leh Hospital Sunday thupui sawi turin Hospital-a thawktute kohhran 22-ah an kal ang.
