SYNOD BOOKROOM REDUCTION SALE 2023
July 10, 2023 | NEWS
Synod Bookroom chuan vawiin (July 10, 2023) atangin Reduction Sale chu Mizoram puma Synod Bookroom Branch leh Distribution Center zawng zawng leh Churachanpur-a Synod Bookroom-ah te a tan leh ta.
Synod Bookroom-in tun tuma Reduction Sale a kalpui tur hi chawlhkar hnih chhung atan ruahman niin July 22, 2023 (Inrinni) thleng a awh dawn a ni. Reduction Sale-ah hian Synod Bookroom-a lehkhabu zawng zawng, Bible, Kristian Hlabu, Communion thil, Kohhran mamawh chi hrang hrang, Stationery Item zawng zawng leh School Naupang mamawhte 5% - 80% discount-in hralh chhuah a ni a. A tan tirh ni atangin mipuiin an hlut hle.
Synod Bookroom Reduction Sale 2023 hi a rualin Mizoram pumah tukin zing khan tan a ni a. Headquarters Mission Veng-ah chuan Synod Executive Secretary, Rev. V.L. Luaia Hranleh i/c PRESCOM etc., chuan Reduction Sale hi Pathian hnena hlanin Kohhran mipuite’n tangkai taka an hman theih nan a hawng a. Lawngtlaiah chuan Lawngtlai Bookroom Committee Vice Chairman Rev. Lallungmuana’n Pathian hnena hlanin Sale hi a hawng a. Lungleiah chuan Chhim Area Administrative Secretary, Rev. H. Lallianzara’n Pathian hnena hlanin Sale hi a hawng a. Champhaiah chuan Kahrawt Bialtu, Pastor C. Lalchhuanawma’n a hawnna hun kaihruaiin Upa C. Lalthanliana, PRESCOM Board Member chuan Pathian hnena hlanin Sale hi a hawng bawk a. Serchhipah Pastor Zorammawia, Vice Chairman, Serchhip Bookroom Commtt leh Chhiahtlang Bialtu Pastor ni bawk chuan sale hi tawngtainain a hawng a, Mamit-ah Pastor Laltharzuala, Chairman, Mamit Bookroom Commtt-in tawngtainaa hawngin Sale kalpui zui a ni a. Kolasib-ah Pastor H. Zathuama, Kolasib Bookroom Chairman chuan Pathian hnena hlanin Sale hi a hawng a. Hnahthial-ah chuan Upa Laltanpuia, Hnahthial Branch Committee Secretary chuan sale hi tawngtainaa hawngin Sale kalpui zui a ni bawk. Siaha-ah Rev. Hmingthansanga Pachuau, Chairman, Siaha Bookroom Commtt-in Pathian hnena hlanin Sale hi a hawng.
Aizawl khawpui chhunga Branch zingah Vaivakawn Branch-ah chuan Vaivakawn Kohhran Committee ruahmannain Rev. Samuel Lalrinsanga’n sale a hawng a, Bawngkawn Bookroom-ah Pastor C. Lalrintluanga chuan sale hi hawngin hawnna hunserh hman a ni bawk. Chanmari Branch-ah Chanmari Kohhran Committee ruahmannain Rev. Vanlalnghaka, Bialtu Pastor (Synod Moderator Elect ni bawk) in sale a hawng a. Khatla Branch-ah Upa H. Lalhmingliana’n sale hi tawngtainain a hawng bawk.
Synod Bookroom Reduction Sale hi mipuiin lehkhabu tha leina hun remchangah hmangin an hlut hle thin a. Sorkar Office leh Kohhran leh Mimal Library neite pawhin a hlawma lehkhabu leina hunah an lo hmang tawh thin a. Hetiang huna lehkhabu an hralh chhuah thin hi a buatsaihtu, Synod Bookroom lama hotute beisei leh rin ai pawhin a tam thin nia thu dawn a ni.
Reduction Sale hnuhnung ber nikum 2022 khan chawlhkar hnih chhunga lei chhuah kha Rs. 2,43,32,633/- lai a tling a. Kumin hian kum hmasa lama sale zatte hi khum ngei an inbeisei thu Synod Bookroom lama hotute chuan an sawi.
Tun tum Reduction Sale hi Synod Bookroom Branch 16 leh Distribution Centre 46 ah kalpui tura ruahman a ni a. Lehkhabu item 7,500 chuangah discount hi kalpui a ni dawn a ni.
