August 10, 2023 (Ningani) khan Synod Office-a thawktuten zing Devotion-ah National Protest Day an hmang a, Synod Moderator-in hun hmangin Dalit Kristian leh Muslim-te tan tawngtairualna hun hman a ni bawk. National Protest Day hi Dalit Kristian te leh Dalit Muslim-ten an chanvo tur Kristian/Muslim an nih avang ngawta hamthatna an chan tak loh duh lohzia lantir nana hman thin a ni.
Kum 1950-ah khan Scheduled Caste chungchangah India ram President-in thupek tha lo tak a chhuah a 'Dalit-te chu Hindu sakhua ni lo, Kristian emaw, Muslim emaw-ah an inleh chuan Scheduled Caste-ah chhiar tel an ni thei lo vang.' tiin. He dan avang hian Dalit Kristian leh Dalit Muslim-te chu Scheduled Caste-ah telh an ni ve ta lo va. Chuvang chuan hnam hnuaihnung an nih avanga an chanvo leh hamthatna zawng zawng an hloh fai vek a ni. He dan hi mipui hriat tura puanzar a nih atang khan Dalit Kristian leh Dalit Muslim-te chuan kum tin August ni 10 hi National Protest Day-ah an hmang ziah thin a ni.
National Council of Dalit Christian-te, Catholic Bishop's Conference of India te, National Council of Churches in India leh pawl hrang hrangte leh mi malte pawhin rorelnaa ngaihtuah tha turin kum 2004 atang khan vawi tam tak lehkha an lo thehlut tawh thin a, April ni 12, 2023 khan Supreme Court of India chuan India ram Kohhran hruaitute ngenna thu leh hla ngaihtuahsakin, zir chiang tur bik Nodal Officers (Ukil rual) a din a, mahse heng an zir chianna te hi Supreme Court Bench chuan ala ngaihtuah hman rih lo a ni.