Mizoram Synod, Family Guidance & Counselling Centre (FG&CC) in August 18 - 25, 2023 chhunga Church Leaders' Pastoral Care & Counselling Training vawi 37-na, Synod Conference Centre-a a buatsaih chu August 25, 2023 zanah ‘Final Evaluation & Graduation Service’ neiin khar a ni.
He Counselling Training-ah hian Aizawl khawpui chhunga Pastor Bial 9 atangin Kohhran aiawh mi 27 training-ah hian an tel a ni.
Training kharna inkhawm hi Rev. R. Lalhmingthanga'n a kaihhruai a, He hun hmanpuitu Rev. V.L. Luaia Hranleh, Executive Secretary i/c FG&CC chuan Training chhuakte hnenah Certificate semin thuchah a sawi a; "Kan ramah sualna hrang hrang a tam ta hle a, mimal nun chauh ni lovin chhung tin leh Kohhran thlengin a nghawng a ni. Chuvangin kan mite harsatna tawh hi kan vei a ngai tak zet tawh a ni. Chung harsatna tawkte chu Krista hnen ata an kal bo lohna turin ei tur kan pek a, kan tuam dam a ngai a ngai a ni" tiin training chhuakte chu an thil zirte mi dang tana tangkai taka hmang turin a chah a ni.
Training kharna inkhawmah hian Training chhuakte chuan an hlawkpui dan a lema an ziak chu entirin an hrilhfiah a, Upa Dr. K.C. Roduhawma chuan training chhuakte aiawhin thu a sawi a. Venghnuai Pastor Bial Zaipawl te tum hnih zaiin, FG&CC Com. Member zinga mi Rev. J. Lalremsiama chuan Training chhuakte a tawngtaisak a ni.
FG&CC hian Pastor leh Kohhrana rawngbawltu pawimawh (Church Leader)-te pualin Counselling Training buatsaih thin a ni. Pastor-te pual hian kum 1992 atang khan buatsaih thinin Pastor 535 training chhuak an awm tawh a. Tin, Church Leader te pualin kum 2002 atang khan vawi 37 buatsaih tawhin mi 838 Training chhuak an awm tawh bawk a ni.
Synod hian Counselling Centre pakua - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah te a nei a. Heng Counselling Centre pakuaah hian August 17, 2023 thlenga pantu (client) an neih tawh zat chu 56,693 a ni a, kumin 2023 bikah mi 4,680 an nei tawh a ni.