Synod Multipurpose Training Centre (SMTC) buatsaih Lay Leaders Training vawi 222-na chu SMTC-ah Sept. 19-22, 2023 chhung hian neih mek a ni.
Tun tum training-ah hian Presbytery 11 - Khawthlang, Ramlai, Khawthlangtuipui, Chhimphei, Chhimchhak, Aizawl East, Hmarphei, Hmarchhak, Aizawl West-I, Tuichangral South leh Tuipuiral atangin Kohhran Upa 40 an tel thei a ni. Sept. 19 (Thawhlehni) zan khan hawnna inkhawm neih a ni a, Rev. Lalrinthara, SMTC Director-in programme a kaihruai a. Upa Dr. Lalnunsiama Colney, Synod Statistician-in hawnna leh thuchah a sawi a, Pi Liandingpuii, Mission Vengthlang a zai bawk.
Tun tumah hian Rev. Vanlalzuata, Rev. Thangzauva, Rev. K. Lalpiangthara, Rev. Lalrinthara leh Upa Lalsawmliana, Synod Finance Manager te'n training hi an neihpui a ni.
Kohhran Upate tana Lay Leadership Training hi kum 1996 atang khan neih tan niin tûn hi a vawi 222-na a ni a, Kohhran Upa training tawh zât chu mi 7832 an tling tawh a ni. Training-ah hian Kohhran Upate tan Kohhran enkawl dan leh inrelbawlna lam atana pawimawh chi hrang hrangte zir thin a ni a, Kohhran thlarau lam nun enkawl dan tha te zir ho thin a ni bawk.
Training kharna inkhawm hi Sept. 22, 2023 (Zirtawpni) zan hian neih a ni ang a, Rev. P.B. Mankima, Synod Secretary(Jr.)-in trainee-te hnenah Certificate semin thuchah a sawi ang a, Rev. K. Lalpiangtharan SMTC aiawhin lawmthu a sawi bawk ang.