Mizoram Presbyterian Kohhran chuan nakkum 2024-a Puitling Sunday School zirlaibu tur “Isaia Bung 40-66 Hrilhfiahna” tih chu a tichhuak ta.
Nakkum 2024 hian Mizoram Presbyterian Kohhran chuan Puitling Sunday School-ah “Isaia Bung 40-66 Hrilhfiahna” tih an zir dawn a. He zirlaibu hi Presbyterian Pastor-te zinga mithiam, Rev. Vanlalnunmawia Zawngte ziah a ni a. A ziaktu Rev. Vanlalnunmawia Zawngte hi tawn hriat ngah tak, Mizoram chhung leh pawn hmun hrang hranga Pastor hna lo thawk tawh leh Manipur Mission Field-a Field Secretary hial lo ni tawh a ni. He zilaibuah hian zirlai 46 awmin phek 270 zeta chhah a ni bawk. Mizoram puma Synod Bookroom dawr zawng zawngah lei theih tura chhawp chhuah mek a ni a, a chhut man Synod-in 25% a subsidised avangin Rs. 120/- chauha lei theih a ni ang.
Kum thara Mizoram Presbyterian Kohhran Puitling Sunday School zir tur; Zawlnei Isaia lehkhabu hi Kristiante’n an ngainat leh chhiar nasat pawl tak a ni a. Puitling Sunday School zirlai atan pawh tum li, 1947, 1948, 1961 leh 1973-ah te hman a lo ni tawh a, nakkum hi tum nga zirna tur a ni ta a ni.
Presbyterian Kohhran Puitling Sunday School zirlaibu hi Mizo lehkhabu malkhaiah chuan copy chhut chhuah tam ber a ni thin a. Kum 2024 atan hian Copies 90,000 zet chhut a ni.
Mizoram Presbyterian Kohhran Puitling Sunday School zirlaibu hi Mizoram Synod hnuaia Kohhran zawng zawngte zirlaibu a nih bakah Presbyterian Church of Myanmar (PCM) hnuaia Phai Synod pumpui chuan an zirlaibu atan an hmang ve nghal zel a. Presbyterian Church of Myanmar leh Mizoram Synod Partnership Agreement angin Mizoram Synod chuan kumtin Copy 1000 zet a thlawnin Presbyterian Church of Myanmar hi a pe thin a ni.
Puitling Sunday School zirlaibu thar bakah hian Naupang Sunday School department hrang hrang zirlai bu turte peih fel a ni tawh a, tun atanga rei vak lovah 2024 Nilai Leh Beihrual Thupui Bu leh Synod Calendar thar lo chhuak leh tura beisei a ni bawk.