Dr. John Malsawma, Medical Superintendent, Synod Hospital, Durtlang chu Cancer natna avangin October 11, 2023 (Nilaini) dar 5:18 pm khan a boral a, October 12, 2023 (Ningani) hian an chenna Hospital Quarters, Synod Hospital, Durtlangah vui a ni ang a, Khatla thlanmualah phum a ni ang.
Pian leh Murna:
Dr. John Malsawma hi Dr. R. Kapthuama (L) leh Pi Sairengpuii Sailo te fa niin, kum 1964 April ni 22 khan Jorhat Christian Hospital-ah a lo piang a. Unau zinga milai niin, a pianpui unau te chu :
1. Lalthansangi w/o TBC Rozara IRS, Chaltlang
2. Dr. John Malsawma h/o Zoparliani, Durtlang
3. Er. David Sapzova h/o Dr. Zothanzami, Khatla
Kum 1992 January ni 10-ah Zoparliani (Te-i) d/o Lalhmingliana, Dawrpui Veng nen inneiin, fa pahnih an nei a, chungte chu :
1. Biakrinawmi
2. Lalmuanpuia
Zirna, Hnathawhna leh Khawtlang
Kum 1969-ah Hemalata Handique School, Jorhat-ah sikul a kal tan a, a pa hi hnathawhna sawn thin a nih avangin John-a pawh a pa awmnaah school sawnin, Guwahati-ah St. Mary’s School ah te, Aizawl-ah Blue Mount School leh Mary Mount School-ah te a kal a. Kum 1975 khan Darjeeling-a Mount Hermon School-ah Boarding-ah awmin Class IV atanga Class X thleng a zir a, kum 1981 ah Mount Hermon School atangin Class X chu tha takin a zo a. Chumi hnuah Shillong-ah, St. Edmund’s College atangin P.U (Sc) tha takin a zo leh a ni.
Kum 1984-ah B.S. Medical College and Hospital, Bankura, Calcutta University-ah MBBS zir tanin kum 1990-ah tha takin a zir zo a.
September thla, kum 1991-ah Presbyterian Hospital (tuna Synod Hospital Durtlang ni ta)-ah Medical Officer hna a thawk tan a. Kum 5 a thawh hnuin, kum 1996-ah MD (Pediatrics) Christian Medical College & Hospital (CMC) Ludhiana-ah zir leh in, December 1999 khan tha taka rawn zir chhuakin Durtlang-ah a hna a chhunzawm a. Kum 2002, March thla khan Specialist in a lut a, March 2015 ah Sr.Specialist-ah hlan kai a ni. 1st January, 2016-ah Deputy Medical Superintendent hna a chelh tan a, 1st January, 2022 ah Medical Superintendent hna zawm leh in, a hun tawp thlengin thahnemngai takin Synod Hospital, Durtlang-ah a thawk a ni.
Dr. John Malsawma hian kum 1990 khan Pathianah piantharna a chang a, Republic Veng Presbyterian Kohhran Biak In-ah testimony ngaihnawm tak sawiin, a hun puma Pathian rawngbawl duhna rilru lian tak nei in Durtlang Damdawiin hi a zawm tih a sawi. Hospital tan hmathlir tam tak a nei a, a ngaihtuahna tam ber luahtu pawh Hospital hi a ni. Damdawi In hmasawnna atan kawng tinrengin a tangkai em em a, hmasawnna duh em em reng tu a ni a, Unit hrang hrangte hmasawn dan tur ruahmanna pawh a siam thin a ni. Khumbet a a damloh hnu pawh hian a tawng peih phawt chuan Damdawi In tana a hmalakna turte sawi nuam a ti em em reng a ni.
Indian Medical Association (IMA), Mizoram State Branch-ah Ex-ecutive Committee Member-ah tel chho reng in, kum 2007 leh 2008-ah Assistant Secretary chanvo a chelh a, chu chanvo chu kum 2019 atanga chelh chhunzawm leh in, vawiin thlengin chaklo chungin a la chelh a ni. IMA activity hrang hrangah a kul a taiah tangin ke a pen chhuak thin a, Mizoram mipuiten hriselna lama hma a sawn theih nan thahnemngai takin hna a thawk thin a ni.
Tin, Indian Association for Paediatrics (IAP), Mizoram State Branch-ah kum 2018 atanga vawiin thlengin Treasurer chanvo a chelh a, tin, Indian Association for Paediatrics (IAP) East Zone-ah kum 2018 atanga vawiin thlengin Scientific Committee Member a ni bawk a ni.
Kum 2013-2015 chho a Mizoram a nausen chhan hriat loha thi an awm leh thin kha ngun tak a zirchian tha a ti a, chuta a zirchiannaah chuan nausen thi te hian Thiamine (Vitamin B1) tlakchhamna neiin chu chuan Infantile Beriberi natna a thlen tih a hmu chhuak a. Hei vang hian Mizoramah Infant Mortality rate pawh nasa takin a tlak hniam phah a ni. Hei vang hian Plenary Speaker ni turin International Conference and Expo in Padeatrics and Neonatology (ICEPN), March ni 23-24, 2020 a Dubai-a neihah pawh sawm a ni a, American Journal of Padeatrics-ah pawh Editorial Board ah pawh ruat lo niin, East Zone Academy of Padeatric Executive Board 2019 ah te pawh Scientific Committee member lo ni tawh a ni.
Mizoram Sawrkar-ah pawh March 2015 khan a thil hmuhchhuah hi a phochhuak a ni. Journal of Indian Pediatrics Vol. No. 57 April 15, 2020 chhuakah a thu chhuah chu tarlan a ni. A thil hmuh chhuah behchhan hian mi tam takin research an bei a, journal-te, article-te an ziah phah hial a ni. Hemi avang hian Qatar-ah pawh thusawi tura sawm a ni a, amaherawhchu a damloh tak avang hian an sawmna chu a puitlin thei ta lo a ni.
COVID-19 hri a lenlai khan Hospital Task Force-ah Chairman niin, ama kaihhruaina hnuaiah hospital a hri leng darh tur an veng a. Tin, COVID-19 vei te enkawlna kawngah pawh nasa takin hma a la thin a ni. COVID-19 vei tawh naupangte natna chi khat MIS-C an tih chu kum 2021, May thla khan Mizorama hmuchhuak hmasa bertu a ni bawk.
Continuing Medical Education (C.M.E) te pawh hi a ngai pawimawh em em a, thahnem ngai taka hma a lakna a zarah hospi-tal a thawk te pawh in hma an sawn phah hle a ni.
A hna avangin Durtlang khawtlang leh Kohhranah tel tam hman lo mahse, a theih ang tawkin thahnem a ngai em em thin a. Presbyterian Kohhran-ah Finance Committee Member a ni mek a, Pathian ram ngai pawimawh mi niin, Hospital Chapel inkhawm khaidingtu zinga pakhat a ni bawk.
A mizia
Dr. John Malsawma hi pa zaidam, nu leh pa thuawih tak a ni a, pa tawngkam nem lem lo tak a nih avang hian amah neltu tan lo phei chuan nelawm loh tak a ni ve mai thei. Thil han pehhel a, han thluaithlum vel aiin a nihna anga sawi mai chi a ni. Thil tih tur a koa tla chu a tlanchhiatsan ngai lo. Thil a tih tawhah chuan hlawhtlin ngei duh mi a ni. Huan thlai siam leh pangpar chin nuam ti mi a ni. Chhungkhat laina tana chhenfakawm tak niin, a thilphal em em a, damlo mangang leh rethei tan pawh insengso thinin, a nupui fanaute tan pa nih a tling tak zet a ni.
Dr. John Malsawma hi mizia nghet tak nei a ni a. Amah hi thian kawm thiam, mi te pawhin an ngainat em em a ni. A thiante pawhin an ngaina in an hlut em em a, a zirna School, College, CMC Ludhiana thian a tawnte chu tha tak leh nghet takin a vuan nung reng a ni. A dam loh tirh atangin Kolkata-a inentir tura a kal a, treatment a lak chhung zawng khan duhsak takin heng a thiante hian an enkawl a, Aizawl-a a lo chhoh hnu pawh hian an rawn ngaihven reng a ni.
A nat dan
Kum 2022 April thla chawhnu lamah a pum pai a nuam theilo a, duty pahin 26th April-ah Ultrasound tih sak niin, a Pancrease-ah fello a awm tih hriat a ni a, CT Scan tih chhunzawm nghalin, chu chuan Ca Pancreas ni ngei a rinna a rawn siam ta ni. TATA Cancer Hospital, Kolkata-ah kalin a tul ang ang tihzui a ni a. Chemotherapy lak tur zat a lak zawh hnuah check-up a a zuk kal leh chuan a Cancer-ah engtinmah a thawk lo tih hriat a ni ta a. Hetiang dinhmun harsa taka a awm chung khan a chhungte leh thawhpuite tan hmuh hrehawm khawp hmel leh rilru na hmel a pu ngailo, Pathian thu thu a nihzia a sawi thin. Enkawl theihna awmchhun, zai chu huaisen taka hmachhawnin an zai ta a. Zawi zawia lo tha chho tura ngaih niin Aizawl-a rawn let leh hnu pawh hian a tha fu mai a. Mahse an zai hian a kawchhung lam an khawih nasat avangin harsatna hrang hrang a rawn nei chho ta a. Durtlang Hospital-ah Doctor leh Nurse a thawhpui ten uluk tak leh duat takin an enkawl a, that lam a pan ve hret hret zel nia kan hriat laiin harsatna a han nei leh thin a. A thil ei a pai that hleih theih loh avangin a taksa a chak hlei thei lova. September thla chawhnu lam atang khan a chau zual ta riau va. September ni 22 khan a chau zual thut a, a tuk ni 23 khan ICU ah suan luh leh a ni. Duat tak leh lainat taka enkawl niin, ni 11.10.2023 (Nilaini) tlai dar 5:18 khan he leia a hringnun chu a lo hmang zo ta a, A rawngbawl sak thin Lalpa hnenah a chawl ta a ni.
A damloh chhungin a phunnawi ngai lo a, a nupui fanau, chhungte tan leh Damdawi In thawktute tan hmuh hrehawmin a awm ngailo, a ‘positive’ em em reng a, ‘Pathian ringtu - Patling’ a nihna chu a hun tawp thlengin a lantir a ni.
VUINA PROGRAMME
DURTLANG
~ Vui hun ~
October ni 12, 2023 (Ningani) chhun dar 12:00
~ Vuitu ~
Pastor Malsawmdawngliana
~ Thusawi ~
Chhungkaw aiawh -Zoparliani (A Nupui)
Hospital aiawh -Dr. Lalthakima, Director
Synod Hospital
~ Zaipawl ~
Hospital Zaipawl (KHB No. 492)
~ Tawngtaisakna hmangtu ~
Upa Lalhmuaka (Bialtu Upa)
KHATLA
~ In leh Thlanmuala Hun hmangtu ~
Pastor C. Sapkaia
Condolences :
“In our hearts, Dr. John Malsawma will forever remain a symbol of simplicity, altruism, and the power of genuine friendship. May his soul find eternal peace, and may his memory continue to serve as a guiding light for all of us who were fortunate enough to know him.”
- Dominic Chandarasanti, Thailand, School Classmate, MHS
“John is a giant of a human being. His presence is hard to ignore. He radiates peace and joy and general sense of calm. It was always com-forting to have him as a friend, teacher and colleague. His love for family and Mizoram was always apparent. I feel blessed God allowed our paths to cross and his friendship will always be cherished.”
- Dr. Sandhya Jose, Swanland, East Yorkshire, UK
“I pray that May our Good Lord Jesus lay his hands on John and com-fort him.”
- Neeraj Dil, School Classmate, MHS
“A wonderful life cut Very short A soul who touched thousands and thousands of people.”
- Dr. D.S. Batth, Batchmate, CMC, Ludhiana
“He was a gentle giant and had an untimely sense of humour even in the most tense situations, whether it involved patients or our depart-ment head. No one could be unhappy around John, and he always looked out for his colleagues and juniors in CMC.
We will definitely miss you now but we know that we will meet again.
Rest in peace, Johnny.”
- Dr. Ajit Varghese, Varghese Medical Consulting Pty, Australia
“I had the pleasure of John's company, support and counsel and now I have his memory which are all good.”
- Dr. Raji Mathew Varghese,Paediatric Dept. 1997-1999
“You alwas made things easier for others while taking all difficulties yourself. The good old times would never come back, but those ever-lasting memories are a treasure.”
- Dr. Prabhjot, Max Health Care, Delhi
Dr. John Malsawma chanchin Booklet