Vawiin (Oct. 19, 2023) chawhma dar 10 khan khan Mizoram Presbyterian Kohhrana Pastor nupuite Intawhkhawm chu Pi Zaii Hall, Synod Conference Centre-ah neih a ni a, Pastor nupui 207 an kal thei a ni.
Kumina Pastor Nupui Intawhkhawm hi a vawi 43-na a ni a. Hun hnihah, chawhma hun leh chawhnu hunah then a ni a. Chawhma hun chu Pi Zokimi (Synod Moderator, Rev. Dr. C. Chawnghmingliana nupui)-in a kaihruai a. Synod puipate zing atanga thusawi ngaihthlak a nih bakah thupui, 'Pastor Nupuite leh tunlai khawvel' tih chu Upa C. Ngurthantluangan a sawi a ni.
Chawhnu hun hi Dr. Zohmingliani Hrahsel (Executive Secretary, Rev. V.L. Luaia Hranleh nupui)-in a kaihruai thung a. Intihhlimna hun te hman a nih bakah thupui, 'Hriselna atana ei leh in lam' tih chu Pi Lalrinngheti Ralte-in a sawi a. Pi Zokimin Directory a tlangzarh bawk a ni.
Presbyterian Kohhran Pastor Nupuite hian kumtin intawhkhawmna hun an hmang thin a, mi thiamte ruaiin thuchah ngaihthlak bakah thupui thlan bik paper te an zirho thin a, an pasalte rawngbawlna an tawiawm theih dan tur leh Kohhran tana Nu nih tling an nih theihna tura theih tawpa hma la tura infuihna hun atan te hman a ni bawk thin.