November 5, 2023 (Pathianni) hi Khawvel Sunday School Ni a ni a. Kumin Khawvel Sunday School Ni-ah hian Mizoram Presbyterian Kohhran chuan puitlingah "Rev. V.L. Zaithanga chanchin" Rev. C. Rosiama ziah an zir ang a. Intermediate - Senior-in "Dietrich Bonhoeffer-a chanchin" Rev. J.H. Zaikima ziah an zir ang a, Beginner - Junior-in "Zirtir Thoma chanchin" Dr. Rosy Zoramthangi ziah an zir ang.
Sunday School hi kum 1780-ah England ram, Gloucester khuaa Robert Raikes-a din a ni a. Hemi hma pawh hian mi thahnemngai eng emaw zatin anmahni huam chhungah mumal deuh takin an kalpui tawh a. Kalphung fel zawka a indin chhuahna leh a darh zau takna chu Robert Raikes-a hmalakna a ni. Thilsiamna hmuna thawk naupangte, ziah leh chhiar thiam lo, inkhawm ngai miah lote chu hruai khawmin Pi Meredith-i inah ama sum senga zirtirtu ruaiin a zirtir a. Vawi khat class lakah zirtirtute hi shilling khat a hlawhtir nia sawi a ni. Kum 1805 atangin John Wesley-a hma laknain hlawh neia zirtirtu rawih chu tihtawp a ni ta a ni.
Dodalna nasa tak hnuaia bul tan ni mah se, Sunday School hi mi chanhaiten zirna an dawn theihna hmasa ber a nih avang leh Sunday School kaite nunah danglamna nasa tak an hmuh avangin a darh zau zel a. A tira hmusit taka elsentute ngei chuan, "Robert Raikes-a hian Gloucester khuaa sihal rualte chu beram novah a chhuah vek a ni," an ti hial a. Pawi khawihna tlahniama jail tang an tlem tak em avangin Gloucester khua leh a chheh vela dan lek kawhtu leh thu buai remtu inzawm khawmte chuan kum 1805-ah Robert Raikes-a hnenah inthurualin lawmthu sawina lehkha an thawn hial a ni.
India ramah July 9, 1803 atangin missionary ropui William Carey-a leh a thiante (Serampore Trio) hma laknain Sunday School neih tan a ni a. Mizoramah pawh Zosap Rev. D.E. Jones-a (Zosaphluia) hma laknain February 20, 1898 atangin mei mit lovin kan nei zui ve ta a ni.
Kum 1785-ah Society for Promoting Sunday School in the British Dominions din a ni a, January 11, 1791-ah American Sunday School Society din a ni leh a, India ramah pawh 1876-ah Indian Sunday School Union din a ni. Khawvel huapa Sunday School inzawm khawmna 'World Sunday School Association' chuan kum 1889-ah London-ah convention hmasa ber neiin kum thum danah neih thin a ni.
Khawvel Sunday School Ni neih hi World Sunday School Association-in kum 1907-a Rome khawpuia Convention an neih tumin Dr. George W. Bailey-a chuan a rawt a, chu thu chu 1910-a Washington-a Convention an neih tumin an sawi ho leh a, May 22, 1910-ah hman tan a ni ta a ni.
Kum 1944 February ni 16-a MSSU Committee-in a rel angin Mizoramah chuan kum 1944 atangin Khawvel Sunday School Ni hman tan a ni a, 1949 atangin November Pathianni hmasa berah thupui neia hmang tanin, kum 2001 atangin puitling leh naupang lam ten zirlai hran an zir tan a, kum 2019 atangin naupang lam chu hmun hnih - Beginner - Junior leh Intermediate - Senior-ah then a lo ni leh ta a ni.