November 9-11&13, 2023 chhung hian Synod Executive Committee chu a vawi 303 nan an thu khawm a. Meeting hi Rev. Dr. C. Chawnghminglianan a kaihruai a, Upa B. Lalhmunliana, Synod Secretary-in report a pe a, Rev. V.L. Luaia Hranleh hnen atangin Finance Officer report ngaihthlak a ni bawk.
Secretary report-ah hian Synod puipaten Presbytery hrang hrangah inkhawmpui an hmanpui thu te, July 1-17 chhung khan Moderator, Rev. Dr. C. Chawnghmingliana leh Sr. Exe. Secretary, Rev. C. Zorammawia ten PC Wales General Assembly an zu hmanpui thu te, August 25-27, 2023 chhunga Tuikual North Kohhrana Harhna Inkhawmpui vawi 8-na hman a nih thu te, Manipur buaina avanga harsatna tawkte tanpui nan pawisa fai Rs. 94,20,000/- pek a nih thu te, he buaina avanga Relief Camp-a awm mekte tana bungbel Rs. 5,00,000/- man leisak tura rel a nih thu te, silhfen leh mut bu bial hrang hrang panga atanga dawn khawm chu November 3-ah Churachandpur phurh thlen a nih thu te leh hmalakna dangte ngaihthlak a ni.
Tun tum SEC thut khawmah hian agenda 107 ngaihtuah ho tura chhawp chhuah a ni a. Committee hrang hrang atanga agenda lut zingah Synod Higher Secondary Principal tur thlan leh P.C. Girls Headmistress ruat chungchang te, inkhawm tihtlem chungchang zirchianna te, Synod Pay Commission hmalakna te, PRESCOM Department en thatna te, Synod Pension Dan 2014 en that rawtna te, Synfo Inkaihhruaina enthatna te, Pathian Biak Inkhawm kalhmang zir chianna te a tel a. Presbytery atangin agenda eng emaw zat a lut bawk a. Chung zingah chuan Kohhran Pavalai Pawl inkhawm hun inang tlanga neih rawtna te, Kristian Hla bu-a hlate audio-a daha YouTube-a dah rawtna te, kan rama Ministry hrang hrangte zir chiana thawh ho dan kawng zawn thu te, Synod Prison Ministry tihchangtlun rawtna te, Synod Archives tihchangtlun rawtna te, Central KTP hmalakna pakhat YRC a puitlin thuai theih nan Synod-in hmalakpui tura rawtna te a tel a ni.
Ruahmanna hmasaah chuan SEC thut khawm hi November 7-9 chhunga neih tur a ni a. Mizoram MLA General Election nen a innan tak avangin thut khawm hun hi sawn tlai hret a ni ta a ni.
For more Pics Click Here