Synod Multipurpose Training Centre (SMTC) buatsaih Lay Leaders’ Training vawi 223-na chu SMTC-ah November 14, 2023 (Thawhlehni) zan khan hawnna inkhawm neih a ni. 

Programme hi Rev. Lalrinthara, Director-in a kaihruai a, Rev. C. Zorammawia, Senior Executive Secretary-in thuchah sawiin Lay Leaders’ training hi a hawng a, Nl. Thelma Lalhmingthangi, Mission Vengthlang a zai bawk.  

Tun tum training-ah hian Presbytery 8 - Aizawl West, Aizawl West-II, Aizawl East, Tawi, Hmarphei, Hmarthlang, Chhimthlang leh Tuivawlral atangin Kohhran Upa 41 an tel thei a ni. 

Training-ah hian Rev. Vanlalzuata, Rev. Thangzauva, Rev. K Lalpiangthara, Rev. Lalrinthara leh Upa Lalsawmliana, Synod Finance Manager te chu Resource Person tur an ni. 

Kohhran Upate tana Lay Leadership Training hi kum 1996 atang khan neih tan niin tûn hi a vawi 223-na a ni a, Kohhran Upa training tawh zât chu mi 7873 an tling tawh a ni. Training-ah hian Kohhran Upate tan Kohhran enkawl dan leh inrelbawlna lam atana pawimawh chi hrang hrangte zir thin a ni a, Kohhran thlarau lam nun enkawl dan tha te zir ho thin a ni bawk. 

Training kharna inkhawm hi November ni 17, 2023 (Zirtawpni) zanah neih a ni ang a, Rev. Dr. C. Chawnghmingliana, Moderator-in trainee-te hnenah Certificate semin thuchah a sawi ang.

For more Pics Click Here