Nimin (Nov. 23, 2023) khan Pi Zaii Hall, Synod Conference Centre-ah Presbyterian Pastor Pension Fellowship Intawhkhawm vawi 53-na hman a ni a. Session hnihah thenin chawhma leh chawhnuah te hun hman niin tlaiah chawhlui an kil ho nghal a ni.
Intawhkhawm Session 1-na hi Rev. Dr. Zaihmingthanga, PPPF Chairman-in a kaihruai a. Rev. Dr. H. Vanlalauva, PPPF Secretary hnen atangin report ngaihthlak a ni. Thupui, 'Pension nun hman dan tha' tih chu Rev. C. Chawngliana, PPPF Fin. Secretary hnen atangin ngaihthlak a nih hnuah sawi hona hun hman zui a ni. Chawhnu hun hi Rev. C. Rosiama, PPPF Vice Chairman-in a kaihruai ve thung a. Thupui sawi hona, sharing leh intihhlimna hun atan hman zui a ni a. Rev. Dr. Lalchungnunga, PPPF Asst. Secretary hnen atangin lawmthu sawina ngaithlak a ni. Chawhma leh chawhnu programme-ah hian Nl. H. Lalremruati a zai bawk.
Presbyterian Pastor Pension Fellowship-ah hian Pastor pension apiang an tel zel a. Kum tin intawhkhawm hi neiin infuih tharna leh inpawh tlanna hun hlimawm tak an hmang thin a ni.