Vawiin (Nov. 28, 2023) chawhnu dar 1:00 khan Pi Zaii Hall, Synod Conference Centre-ah November 15-28 chhunga Family Guidance & Counselling Centre (FG&CC)-in Pastoral Care & Counselling Training vawi 31-na an buatsaih kharna hun hman a ni. Tun tumah hian Mizoram Presbyterian Kohhran Pastor 24 bakah Myanmar atangin Pastor 5 an tel bawk a, an vaiin mi 29 an ni.
Rev. V.L. Luaia Hranleh, Executive Secretary-in Graduation Service hi a kaihruai a, Inlawmna leh inhmelhriattirna Rev Dr. Vanlaltluangan a nei a. One in Christ an zai zawhin Rev. R. Lalhmingthangan Final Evaluation a tihpui a. Rev. Dr. C. Chawnghmingliana, Synod Moderator-in Certificate a sem zawhin thuchah a sawi a sawi a. "Counselling rawngbawlna hi thil pawimawh leh huhphurhawm tak si a ni a, chuvangin Pathian rinchhan chunga he rawngbawlna hi nasa zawka kan kalpui zel a ngai a ni" tiin training chhuakte chu an thil zirte mi dang tana tangkai taka hmang turin a chah a ni.
Trainee-te hian an hlawkpui dan a lema an ziak chu entirin an hrilhfiah a, trainee-te aiawhin Rev. Dr. Malsawmtluangan thu tawi a sawi a. One in Christ leh trainee-te atangin Male Voice ngaihthlak a ni. Trainee-te tana tawngtaisakna hun Upa Lalmalsawma, Com. Member-in a hmang a, Rev. Lalsangbera, Director, FG&CC-in lawm thu a sawi bawk a ni.
FG&CC hian Pastor leh Kohhrana rawngbawltu pawimawh (Church Leader)-te pualin Counselling Training buatsaih thin a ni. Pastor-te pual hian kum 1992 atang khan buatsaih thinin Pastor 561 training chhuak an awm tawh a. Tin, Church Leader te pualin kum 2002 atang khan vawi 37 buatsaih tawhin mi 838 Training chhuak an awm tawh bawk a ni.
Synod hian Counselling Centre 9 - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah te a nei a; tunah hian Chanmari, Aizawlah Centre hawn belh leh tura ruahmanna kalpui mek a ni. Heng Counselling Centre pakuaah hian November 14, 2023 thlenga pantu (client) an neih tawh zat chu 59,395 a ni a, kumin 2023 bikah mi 7,361 an nei tawh a ni.
For more Pics Click Here