Mizoram Presbyterian Kohhran chuan nakkum 2024 atana Nilai leh Beihrual Thupui zirlai bu tur chu a tichhuak ta a, Synod Bookroom Branch hrang hrang leh Distribution Center-ah te lei theiha chhawp chhuah a ni. He thupui bu hi phek 220-a chhah, Rs.140/- man a ni.
Nakkum 2024-a Nilai leh Beihrual Thupui zir tur hi “Kristiante Mawhphurhna” tih a ni a, Rev. Vanlalrova Khiangte ziah a ni.
2024 Nilai leh Beihrual Thupui Bu bakah Synod Calendar, phek khat chi leh a keu chi peih fel a ni ta a, kum tin Synod Calendar phek mal chi-ah hian Synod Statistics pawimawh tarlan tel thin niin Rs.20/- man a ni ang a, a keu chi-ah hian thlalak hmuhnawm tak tak dah niin Rs.70/- man a ni thung. Kristian Diary leh 2024 Puitling Sunday School zirlai bu thar bakah Naupang Sunday School zirlai bu thar pawh Bookroom Branch hrang hrangah lei theih a ni tawh bawk.