SYNOD INKHAWMPUI VAWI 100-NA : ROREL NI 1-NA
December 6, 2023 | Synod Information
December 6, 2023, chawhma dar 9:30-ah inkhawmpui tan a ni a. Palai lawmna, inchhiarna, Synod pawn palai lawmna leh inkhawmpui chibai bukna neih a ni. He mi zawh hian Moderator tang lai Rev. Dr. C. Chawnghmingliana chuan Rev. R. Vanlalnghaka hnenah Moderator nihna a hlan. Rev. R. Vanlalnghaka, Moderator-in Pathian thu Sam 19:7-9 a chhiar a, rorel tan a ni.
Nomination thu ngaihthlak a ni a, kum 2024 Synod Inkhawmpui programme leh puipa turte pawm a ni. Puipa turte chu
Moderator - Rev. R.C. Lalnghakliana, Synod Office
Secretary (Sr.) - Rev. P.B. Mankima, Chhinga Veng
Secretary (Jr.) - Upa Vanlalsawma Siakeng, Ramthar Tlang Veng
Finance Officers - 1. Rev. VL Luaia Hranleh, 2. Rev. PC Pachhunga
Statistician - Rev. H. Laltlanthanga, Tlangnuam
Sr. Executive Secretary - Rev. C. Zorammawia
Executive Secretary - Rev. Dr. K. Lallawmzuala
Kum 2024, 2025 leh 2026 inkhawmpui thlengtu tur chu inkhawmpui hmasa lamah tihfel a lo ni tawh a. Kum 2027 Synod Inkhawmpui chu Ramhlun North Pastor Bialin Ramhlun North Kohhran Biak Inah an thleng ang.
Kum 2024-a Pastoral Ministry thupui atan 'Inpumkhatna' Johana 17:11 (b) pawm a ni a, Pro. Pastor pawh mi 14 lak tura pawm a ni bawk.
Pastor Bial thar 5 hawn tura pawm a ni a. Chu'ngte chu - Kolasib Tumpui Bial, Buhchangphai Bial, Darlak Bial, Bawrai Bial, Saipum Bial leh Delhi Bialte an ni. Minister, Pastor leh Pro. Pastor-te awmna tura Pastoral-in ruahmanna a siamte chu inkhawmpui hian a pawm bawk.
Tun tum inkhawmpuiah hian General 37 a awm a, ni khatnaa rel hmante chu -
* 'Dan lova sumdawng tihrêm dan kawng zawn' chungchang Aizawl Bethel leh Aizawl Hmar Presbytery atanga lut chu SEC bawh zui tura tih a ni.
* Hmarthlang, Chhimthlang leh Tuirini Presbytery atanga thu lut, 'KTP General Conference leh Kohhran Hmeichhe Inkhawmpui lian hun sawn rawtna' chu kal dan ngai a tha e, tih a ni.
* 'Ram pum huap Hla Kûtpui neih' rawtna Chhimchhak Presbytery atanga lut chu sawihona a tawk e, tih a ni.
* Tuichang Presbytery atanga lut, 'Sunday School kai kim chhiar dan ennawn' rawtna chu kan kal dan ngai hi a tha e, tih a ni.
* 'Bengngawng, tawngtheilote puala inkhawmna buatsaih' rawtna Aizawl Bethel Presbytery atanga lut chu kan kal dan pangngai hi a tha e, mahni Kohhranah pawh hma lak theih tho a ni e, tih a ni.
* Aizawl Hmarchhak Presbytery atanga thu lut, 'Rualbanlote enkawlna School din' rawtna chu kan kal dan ngai hi a tha rih e, tih a ni.
Dar 4:10-ah rorel zawh a ni a, Rev. Rualkhuma'n Pathian hnenah tawngtaiin rorel ni khatna a tin.
SYNOD INKHAWMPUI VAWI 100-NA : ROREL NI 2-NA
December 7, 2023 | Synod Information
December 7, 2023, chawhma dar 9:30-ah Rev. R. Vanlalnghaka, Moderator-in Pathian thu Isaia 11:1-5 a chhiar a, Rev. Chawnghranga'n tawngtaiin rorel inkhawm a hlan. Ni hmasa lama rorel minute ngaihthlak a ni a, pawm a nih hnuah rorel ni hnihna chhunzawm a ni.
* 'Probationary Pastor lak dan en that' rawtna Champhai South leh Chhimphei Presbytery atanga lut leh, 'Probationary Pastor interview hun chhung ni 2' rawtna Lunglei East Presbytery atanga lutte chu sawi kawp a ni a, SEC-in lo en tha se, Synod-ah thlen leh tura tih a ni.
* Serlui Presbytery atanga 'Pastor nemngheh thar ram chhunga dah' rawtna lo lut chu kan kal dan ngai hi a tha rih e, tih a ni.
* 'Pastor bial vawn term hmang zo, kum khat chauh service la neite bial danga sawn loh' rawtna Aizawl West I leh Aizawl Chhimthlang Presbytery atanga lut chu kan kal dan ngai hi a la tha e, tih a ni.
* '24 hours online counselling neih dan ngaihtuah chungchang' Aizawl West II Presbytery atanga lut chu kal dan ngai a tha e, tih a ni.
* 'Pathian biak inkhawma sawrkar thu puanzâr thin tihtawp' rawtna Tuichangral North Presbyery atanga lut chu kan kalpui dan hi a la tha tawk e, tih a ni.
* Aizawl Central Presbytery atanga lut, 'Uniform Civil Code (UCC) hman ve loh' rawtna chu hmalak mekna te inhrilhfiah a ni a, sawihona hi a tawk e, tih a ni.
* 'Sunday School zirlai bu, Nilai leh Beihrual Thupui bute dik taka chhut' rawtna Tuirini, Tuichang leh Aizawl Central Presbytery atanga lut chu mawhphurhtuten a tul angin hma lak ni se, tih a ni.
* 'Tualchhung Kohhran inkhawm a bi kima inang tlanga kal' chungchang Aizawl Chhim leh Aizawl West II Presbytery atanga lut chu tuna kan inkhawm kalphung hi zawm theuh tur a ni e, tih a ni.
* Kolasib Presbytery atanga lut, 'Mizo-in kûtpui kan hman thin tha zawka hman' rawtna chu SEC-in a tul angin lo bawh zui rawh se, tih a ni.
* 'Skill development-ah thalaite tana hma lak dan tur kawng zawn' chungchang Aizawl Chhimthlang Presbytery atanga lut chu hmalak mekna a ni a, tha zawka chhunzawm zel ni se, tih a ni.
* Chhimtuipui Presbytery atanga lut, 'Chhimtuipui Presbytery huam chhunga High School leh Higher Secondary School din' rawtna leh 'Champhaia Higher Secondary School din' rawtna Champhai North leh Champhai South Presbytery atanga lut chu sawi kawp a ni a, a remchang rih lo e, tih a ni.
* 'Khawzawla Synod Rescue Home dah' rawtna Tuichang Presbytery atanga lut chu a remchang rih lo e, tih a ni.
* 'Mizoram Christian University din a nih theih nana kawng zawn' rawtna Aizawl Hmar Presbytery atanga lut chu hei hi chu hma kan lak mekna a ni e, tia inhrilhfiah a ni.
Dar 4:18 pm-ah Upa Dr. LN Tluanga Pathian hnena tawngtaiin rorel ni hnihna a tin.
SYNOD INKHAWMPUI VAWI 100-NA : ROREL NI 3-NA
December 8, 2023 | Synod Information
December 8, 2023, chawhma dar 9:30-ah Rev. R. Vanlalnghaka, Moderator-in Pathian thu Sam 106:3-4 a chhiar a, Pathian hnena tawngtaiin Rev. Lalnghakliana Pautu-in rorel a hlan.
* 'Anpui inkawp (same sex marriage) a bo theih nana hma lak' rawtna Aizawl East Presbytery atanga lut chu Synod hmalak mekna a ni a, Kohhran tinah hma lak chhunzawm zel ni rawh se, tih a ni.
* 'Lehkhabu tha chhiara hma kan sâwn theih nan hma lak' rawtna Aizawl Hmar Presbytery atanga lo lut chu SEC-in a tul angin lo bawh zui rawh se, tih a ni.
* Aizawl West II atanga lut, 'Inneih kaihhruaina inzirtir thar' rawtna chu inkaihhruaina kan neih mek hi inzirtir thar leh tha tih a ni a, SEC bawh zui tura dah a ni.
* 'Contract hna hralh chungchang' Champhai North Presbytery atanga lo lut chu Kohhran duh loh zawng a ni a, SEC-in hma lo la rawh se, tih a ni.
* 'Kolkata leh Delhi-ah Administrative Secretary dah rawtna' Aizawl Chhim Presbytery atanga lo lut chu a la tul rih lo e, tih a ni.
* Chhimphei Presbytery atanga lut, 'Chhungkaw harsate khai chhuak zâwnga tun aia nasaa hma lak' rawtna chu SEC-in chak zawkin hma lo la rawh se, tih a ni.
* 'Pêm Upa thlan nawnte Certificate pek' rawtna Kolasib Presbytery rawtna chu rem tih a ni a, SEC bawh zui tura tih a ni.
* 'Fa lâk (adoption) chungchanga zirtirna siam' rawtna Aizawl West I Presbytery atanga lut chu tha tih a ni a, SEC-in an bawh zui tura tih a ni.
* 'Synod Board/Committee-a Presbytery aiawh thu zui awm thin tihtâwp' rawtna Tuichang Presbytery atanga lo lut chu tha tih a ni a, committee term thar (2025 - 2026) atanga hman tan nghal tura tih a ni.
* Aizawl East Presbytery atanga thu lut, 'Synod-in Vocational Training/Education a buatsaih mek hi sawrkar pawmpui a nih theih nan hma lak' rawtna chu hmalak mekna a ni e, tia inhrilhfiah a ni.
* 'Inkhawmpui rorel tawh leh Kohhran Practice mek tihdanglam thuah fimkhur taka kal' rawtna Teirei Presbytery atanga lut chu fimkhur taka kal zel ni rawh se, tih a ni.
* 'Synod pêm hruaina dan 2017 en that' rawtna Aizawl West I Presbytery atanga lut chu tha tih a ni a. SEC-in hman nghal turin lo ruahman rawh se, tih a ni.
* Tuivawl Presbytery atanga lut, 'Sakramen zirlai hmun danga awmte Dân chhunga lawm luh dan kaihhruaina siam' rawtna chu SEC-in, "Sacrament zirlaite mahni Kohhran ni loa lawm luh chungchangah chuan lawm luh turte awmna Kohhran nena inbe rawna tih chi a ni e" tiin inkaihruaina a lo siam tawh a, hei hi zawm theuh tur a ni e, tih a ni.
* 'Chhungkaw kehchhia kan pun zel loh nan hma lak' rawtna Aizawl Bethel Presbytery atanga lut chu tha tih a ni a, SEC-in hma lo la rawh se tih a ni.
* 'Mizo Kristian Lêngkhâwm Hlate audio-a dah thatna siam' rawt thu Tawi Presbytery atanga lut chu a tha e, SEC-in lo bawh zui rawh se, tih a ni.
* 'Zirlaite hnena Scholarship, Stipend leh Pocket money pêk dân en that' rawtna Aizawl Chhim Presbytery atanga lut chu hman nghal turin SEC-in lo en tha rawh se, tih a ni.
* Kum 2024 leh 2025-a thawktu pension turte chu siam that ngai siam that a ni a, pawm a ni.
* 'Inkhawm tihtlêm chungchanga zir chianna leh Presbytery ngaihdan khaikhawmna' ngaihthlak a ni a, zir chiangtute rawtna siam leh Presbytery ngaihdan angin kan kal dan ngaia kal hi kan tih tur a ni e, tih a ni.
* 'Special Ordination chungchang', SEC-in a zir chianna chu pawm a ni.
Dar 2:54 pm-ah minute ngaihthlak a ni a, pawm a nih hnuah Pathian hnenah Rev. C. Rosiama a tawngtai a, dar 3:25-ah rorel ni thumna an tin.
SYNOD INKHAWMPUI VAWI 100-NA : ROREL NI 4-NA
December 9, 2023 | Synod Information
December 9, 2023, Inrinni chawhma dar 9:30-ah Rev. R. Vanlalnghaka, Moderator-in Pathian thu Sam 89:14-16 a chhiar a, Rev. Dr. C. Vanlalhruaia'n Pathian hnena tawngtaiin rorel a hlan.
* 'SHSS Boys Hostel Building sak that' chungchang (SEC 302:15/2023), SEC-in a ruahman dan ngaihthlak a ni a, rem tih niin, lo bawh zui rawh se, tih a ni.
* 'Synod Office zauh leh siam rem' chungchanga (SEC 297:42/2022; SEC 302:44/2023) ruahmanna tha tih a ni a, SEC bawh zui tura tih a ni.
* 'Council of Churches in Mizoram kalphung leh ruangâm' (OM 9:31/2022; SEC 302:47/2023) chu pawm a ni a, a tul angte SEC-in lo bawh zui se, tih a ni.
* 'Nupa chungchang dan en thatna' (Synod 2022; SEC 301:11/2023; SEC 302:55/2023) chu SEC-in lo en tha leh se, Synod-ah rawn thlen leh rawh se, tih a ni.
* 'Synod hnuaia thawktu transfer & posting chungchang' (SEC 301:13; 302:35; OM 11:5/2023; OM 16:18/2023; SEC 303:16) ruahmanna chu rem tih a ni.
* 'Grape tui Sakramen-a hman chungchang' (Synod 2022:9; SEC 301:20; OM 11:11/2023; OM 19:7/2023; SEC 303:31) chu ruahmannate ngaihthlak a nih hnuah kan hman ngai hi hman chhunzawm ni se, tih a ni.
* 'Synod Pay Commission hma lakna' (Synod 2022:45; SEC 301:22; SEC 303:33) chu pawm a ni a. En that ngai a awm chuan SEC-in hma la se, tih a ni.
* 'PRESCOM Department en thatna' (Synod 2022:9; SEC 301:7; SEC 303:34) zir chiangtute rawtna chu tha tih a ni a, ruahmannate tihlawhtling turin SEC-in chak takin hma lo la rawh se, tih a ni.
* 'Synod-a thawk, Deficit hlawh lâte pension hun' chungchang (SEB 366:6; SEC 303:59) chu kal dan ngai a tha e, tih a ni.
* 'Jail tâng chhuakte chawlh lailâwkna siam' chungchanga (Synod 2022; SEC 302:59; SEC 303:73) SEC rawtna siam - Home hran din loin, a lo din tawh sate thawhpui chu tha tih a ni.
* 'Pathian Biak Inkhâwm kalhmang zir chianna' (SWC 12:6; SEC 303:79) chu ziah that ngai lo ziak tha se, tia pawm a ni.
* 'Masihi Sangati Pastor Quarters sak theihna policy hi Synod-in siam ve rawh se' (Teirei Presbytery; SEC 303:109) chu tun tumah chuan a remchang rih lo e, kan kal dan ngai hi a la tha e, tih a ni.
* Finance Report ngaihthlak a ni a, pawm a ni a. 2024 - 2025 budget estimate Rs. 4,97,58,62,000 chu pawm a ni bawk.
Dar 4:25 pm-ah Rev. Vanlalchhunga'n malsawmnain rorel a tin. Statistics report, Secretary report leh department report-te hmabak a ni a, zan inkhawm banah chhunzawm tur a ni.
SYNOD INKHAWMPUI VAWI 100-NA : ROREL NI 4-NA
December 9, 2023 : Inrinni Zan Inkhawm ban | Synod Information
Zan dar 8:30-ah rorel chhunzawm a ni a, Statistics report (September 2022 - August 2023) ngaihthlak a ni. Statistics tlangpuite -
Presbytery : 47
Pastor bial zat : 298 (+1)
Kohhran zat : 1140 (+10)
Minister bial vawng zat : 298 (+1)
Minister bial vawng lo zat : 105 (+1)
Minister pension zat : 132 (10+)
Minister zawng zawng zat : 588 (17+)
Pro. Pastor zat : 49 (+4)
Kohhran Upa zat : 5523 (+96)
Tual Upa zat : 2352 (+202)
Kohhran mi zawng zawng zat : 6,28,719 (Mipa - 3,04,304; Hmeichhia - 3,24,415)
Secretary report leh department report ngaihthlaka pawm a nih hnuah minute ngaihthlak a ni a. Siam that ngaite siam a nih hnuah pawm a ni.
Hming ziah a nih hnuah zan dar 9:25-ah Rev. C. Zorammawia, Senior Executive Secretary-in malsawmnain Synod Inkhawmpui Vawi 100-na rorel a tin.
» Synod 100 Tlangau 1 (Dec. 6, 2023)
» Synod 100 Tlangau 2 (Dec. 8, 2023)
