December 14, 2023 (Ningani) zan dar 7:30 khan Upper Republic Kohhran Jubilee Hall-ah Family Guidance & Counselling Centre (FG&CC) buatsaih Kristian Chhungkaw Film Insiamsiak result puan leh lawmman sem a ni a, lawmman pakhatna dawngtu chu Kolasib Diakkawn Kohhran (Buang Tingtanga) a ni.

He programme hi Nl. Lalrinfeli Sailo, Bawngkawnin a kaihruai a, Rev. Dr. Lalchawimawia, Comt Member, FG&CC chuan hunserh a hmang. T. Upa PC Vanlalnunmawia, Comt Member, FG&CC chuan report a pe a, Nl. H. Lalremruati'n Pathian fakna hla sa-in, Upa Denghmingthanga, Comt Member, FG&CC chuan film-te Pathian hnenah a hlan. Pakhatna hi enho a ni a, Rev. VL Luaia Hranleh, Exe. Secretary leh FG&CC Comt. member pahnih Upa R. Lalmalsawma leh Upa Lalbiakmawia Khiangte ten lawmman hrang hrang an sem. Rev. Lalsangbera, Director, FG&CC chuan lawmthu a sawi a, Rev. J. Lalremsiama, Comt Member, FG&CC chuan malsawmna-in he programme hi a tin a ni.

Intihsiaknaah hian pahnihna chu Mission Veng Kohhran (Vanram Investment) a ni a, pathumna Khatla East Kohhran (Rawhtuina Mei) te an ni. Lawmman Pakhatna hian Rs. 2,00,000, Pahnihna Rs. 1,00,000, Pathumna Rs. 50,000 an dawng. Heng bakah hian top ten-a lang kohhran pasarih - Chawnpui Kohhran, Ramhlun North Kohhran, East Lungdar Kohhran, Bawngkawn Kohhran, Chanmari West Chhim Veng Kohhran, Bawngkawn Chhim Veng Kohhran, Ramhlun Kohhran ten lawmman an dawng a, intihsiaka tel zawng zawngte tan pawh lawmman hi siam a ni bawk.

Best Actor atan Andrew Laltlankima, Kolasib Diakkawn Kohhran leh Best Actress atan Lalmuankimi, Khatla East Kohhran te thlan an ni. Kristian Chhungkaw Film insiamsiakah hian kohhran 37 an tel a ni.

Kristian Chhungkaw Film hrang hrangte hi Synfo Youtube Channel Synod Information ah dah vek a ni dawn a, a duh tan en theih a ni ang.

Fore more Pics Click Here