Sorkar laipui Ministry of Health and Family Welfare hnuaia division pakhat National AIDS Control Organization in a buatsaih angin, Vawiin chhun dar 12:00 khân, Guwahati-a Dr Banikanta Kakati Auditorium-ah Regional Red Ribbon Quiz Competition neih a ni a. Hetah hian, State 8 telin, West Bengal, Sikkim, Manipur, Mizoram, Arunachal, Nagaland, Meghalaya, leh Assam te an ni a.
He Regional Level-a Intihsiaknaah hian Mizoram Aiawhin, Presbyterian English School, Republic Vêng Naupang - Zonunsangi, Class VIII leh Janet Malsawmpuii Ralte, Class IX te an tel a. Marks 90 hmuin an Champion ta a ni. Mizoram Aiawha kal te hi Miss Zonunpuii Khawlhring, Teacher PESR leh Sir Joseph, Nodal Officer, MSACS ten an kalpui a ni.
Anni hi, Rampum huap intihsiakna - National level-a intihsiaknaah an tel leh dâwn a ni. PES, Republic Vêng hi February 16, 2000 khân din a ni a. Tunah hian Naupang 686 an nei mek a, KG-I - Class X thleng an nei a ni.