January 9, 2024 (Thawhlehni) chawhnu dar 3:00 khan Mizoram Christian College Compound, Tanhrilah College Building lungphum programme hman a ni a. Lungphum Programme hi Rev. VL Luaia Hranleh, Exe. Secretary-in a kaihruai a, Rev. C. Zorammawia, Sr. Exe. Secretary, i/c Synod Trust Committee chuan inlawmna leh report a pe a, Rev. R. Vanlalnghaka, Synod Moderator chuan lungphum hi a phum a ni. Rev. PB Mankima, Synod Secretary-in lawmthu sawiin, Rev. PC Pachhunga, Finance Officer chuan malsawmna-in he programme hi a khar a ni.
Kum 2017 Synod-in a rel angin Mizoram Christian College din tura hma lak tan nghal a ni a. MCC chu kum 2020 October thla khan hawn a ni a, Covid avangin online-a kalpui phawt a nih hnuin Synod Higher Secondary School building hlui hman zui a ni ta a ni. College Building sakna tur hi Tanhril ramah Rs. 4,32,00,000/- senga lei a ni a. Building Plan & Estimate hi TBL Architectural Consultant, Khatla-in an siam a, CZS Construction, Kolasib-in a sak hna an thawk thung ang a, kum li chhunga sa zo tura inremna siam a ni.
MCC Lungphum programme-ah hian Aizawl khawpui chhung Pastor-te, Presbytery Moderator & Secretary-te bakah Synod Office Co-ordinator te leh Synod institution hrang hrang hotute an tel a ni.