January 15, 2024 (Thawhtanni) chhun dar 12:30 khan Women Centre, Phunchawnga zir tur 10th Batch hawn a ni.
Programme hi Pi Zothanpari, Inkhawmpui Lian Chairman-in a kaihruai a. Pi H. Lalfakmawii, General Secretary-in inhmelhriattirna hun a hmang a, Pi R. Lalrinpuii, Women Centre Superintendent-in Hostel Rules chungchang inhrilh hriatna hun a hmang a, Pi Zothansiami, Treasurer-in zir turte lawmna leh fuihna hun a hmang a ni. He hun hi Women Centre Managing Committee, Hunthar Bial Kohhran Hmeichhe Committee leh Phunchawng Kohhran Committee, Kohhran Hmeichhia, KTP leh Kohhran Pavalai Pawl-ten an hmanpui a ni. Women Centre-a zir tur 10th Batch-te hi puan thui zir tur an ni a, zirlai 42 an awm a, heng mite hi thawktu paruk-ten an vil dawn a ni.
Women Centre hi Mizoram Presbyterian Kohhran project pawimawh tak a ni a. Hmeichhe dinhmun harsa leh khawsakna lama tanpui ngaite chawi kanna atana din a ni. Kum 2016 atang khan puanthui zirna tan a ni a, mi eng emaw zatin an zir chhuak tawh. Kum 2017 atangin puantah zirna tih belh niin, mi eng emaw zatin an zir chhuak tawh bawk a ni.
Women Centre-a zir chhuakte hi mahni ke-a dingin chhungkaw ei bel ber an ni ve mek a, midang zirtir chhawnga dawr siamte pawh an awm bawk. Chutih laiin mi hnuaia puanthui leh puantaha thawk mek thahnem tak an awm bawk a ni.