Vawiin (Feb. 28, 2024) hi Zosap Missionary ten Mizoram Presbyterian Kohhran enkawl tura Synod Hospital a hlan ni champha (Hospital Day) vawi 96-na a ni.
Zosap Missionary ten Chanchin Tha an hrilna kawngah tihdam rawngbawlna tulzia leh pawimawhzia te, kan mamawhna sanzia te an hria a. Mizorama Missionary Doctor lo chhuak hmasa ber Dr. Fraser (B.Sc. MD) chu kum 1908-ah a lo chhuak a. A theih ang anga damdawi lam thiamna a hman laiin Mizoram-ah Bawih neih chungchangah Bawrhsapte nen an thu a inhmuh loh avangin Mizoramah awm rei thei lovin kum 1912-ah sap ramah a haw leh ta mai a. Damdawi lama mi thiam kan neih loh laiin Rev. E.L. Mendus (Pu Mena) chuan damlo mangangte thawm a hriatin, “Damdawi In” kan mamawhzia hriain tawngtaina nen tan a la a.
Kum 1924-ah Compounder Pu D. Thianga chuan Dispensary a lo din tawh chu Durtlangah a pempui a. Kum 1928 February 22-ah Dr. John Williams (Pu Daka) a lo chhuak a. Theological School hlui chu damdawi in atan a chei bawl a. March 6, 1928-ah damlo pakhat admit-in “Welsh Mission Hospital” chu an lo din ta a ni. Januay 1, 2012-ah “Synod Hospital” tiin a hming thlak a ni a, vawiin thlengin hman a ni. Damdawi in din tirha mi thiam awmte chu Pu Daka (Dr. John Williams), Pu D. Thianga (Compounder) leh Nurse hmasaber leh awm chhun Pi Tlawmkungi te an ni.
Zosap Missionary ten an awmpui reng theih dawn loh avangin damdawi in chu February 28, 1958-ah Mizo District-a Welsh Presbyterian Mission aiawhin Pi Puii (Dr. GP Roberts) chuan damdawi in chu Presbyterian Kohhran Synod Moderator, Pu J.M. Lloyd-a hnenah Mizoram Presbyterian Kohhran enkawl turin a hlan ta a. Heta an inhlan ni February 28 hi Hospital Day atan hman zui a ni.
Synod Hospital hi Private Hospital ni mai lovin Mission Hospital, hun puma rawngbawlna hmun a ni a. Mi zawng zawng ang khat veka enkawlna chu a dintute duh dan leh an din chhan pawh a ni. Damdawi In thupui (Motto) chu ‘In His Footstep” (A hniaka zui) tih a ni.
Synod Hospital hi a theih chin chinah mahnia inenkawl tura beisei a ni a. Rethei harsa tanpuina kawngah pawh Charity Fund thilpek tlingkhawm bakah pawl leh mimal thilpek an dawng reng a, hemi avang hian sum nei lo, mi harsa tam takin a thlawna inenkawlna an dawn theih phah thin a ni. Damdawi In hi Mizoram Synod hnuaia Hospital Board-in a enkawl a ni.