SYNOD REVIVAL SPEAKER-TE TAN INTUAITHARNA RIAHCHILHIN NEI
March 21, 2024 | NEWS
Synod Revival Speaker-te tana buatsaih Intuaitharna hun chu March 19 - 22, 2024 chhung hian Synod Conference Centre-ah riakluta neih a ni a, Revival Speaker-te an kal kim thei a ni.
Intuaitharna programme hi March 19, 2024 (Thawhlehni) zan khan hawnna inkhawm neih a ni a, Rev. C. Zorammawia, Senior Executive Secretary-in a kaihruai a, Synod Moderator Rev. R. Vanlalnghakan Keynote Address a sawi.
Intuaitharna hun an hman chhung hian Revival Speaker-ten an rawngbawl zelna tur atana pawimawh thupui chi hrang hrang - Revival rawngbawlna thlirletna leh hmathlir, Harhna leh Mizo Kristiante, Thalaite nun leh Revival rawngbawlna leh Kohhran miten Revival Speaker-te an beisei dan tih chungchang te zir ho a ni a, heng thupuite hi mithiam hrang hrangten an zirtir thin a, sawi hona neih thin a ni bawk.
March 21, 2024 (Ningani) zanah kharna inkhawm neih a ni ang a, Rev. C. Zorammawia, Senior Executive Secretary-in thu a sawi ang.
Tun dinhmunah Synod Revival Speaker 70 (mipa 68 leh hmeichhia 2) an awm mek a, harsatna dang a awm a nih loh chuan Synod Revival Speaker-te puala riak luta Intuaitharna hun hi kum tin neih thin a ni.
