Vawiin (May 14, 2025) khan Pu Vanlalngaia, Kulikawn a mi chuan Hlimen Chuhvela a ram bigha 7.5 a zau chu Synod kutah a hlan.
Ram inhlanna hun hi Pu Vanlalngaia in, Kulikawnah neih a ni a, Rev. Dr. Rosiamliana Tochhawng, Executive Secretary-in a kaihruai a, ram neitu Pu Vanlalngaia’n a ram chu Synod kuta hlan a duh chhan sawiin Pathian hnenah ka kum min pawhsei sak hi tangkai takin min hman tir rawh, tiin ka phut ve thin a, chung zingah chuan kan thalai a sing tel teh meuh setana’n an taksa leh an thlarau ti hlum a, hremhmuna a hruai lut tur hi chhanchhuahna beihpui thlak a ngai tak takin ka hria a, kohhran hian hma la sela tih hi ka lo rilruk ve thin a ni, tiin a sawi.
Ram inhlanna lehkhaah hian ram neitu Pu Vanlalngaia leh Rev. V.L. Luaia Hranleh, Senior Executive Secretary ten hming an ziak a, hriatpuitu atan Rev. Dr. Rosiamliana Tochhawng, Executive Secretary leh Upa K. Zoremthanga, Kulikawn ten hming an ziak bawk. Chumi hnuah Pu Vanlalngaia chuan thlarau bo pahnih khat tal chhanchhuaha an lo awm theih nan tiin Rev. V.L. Luaia Hranleh, Senior Executive Secretary hnenah a hlan a ni. He hunah hian Rev. Lalhleia, Director, Synod Prison Ministry chuan a tawiawm bawk.
For more Pics Click Here