Presbyterian Church of India, Mizoram Synod hnuaia Pastor Retreat chu May 27-30, 2025 chhung khan Aizawl Theological College, Durtlangah neih mek a ni a. Retreat-ah hian Mizoram Synod hnuaia thawk mek Pastor leh Minister-te bakah Pensioner te an tel.
Retreat tan zan hian Rev. R.C. Lalnghakliana, Synod Moderator-in inlawmna leh Keynote Address a sawi a. May 28, 2025 (Nilaini) zing dar 7:00-ah Sermon inkhawm neih a ni a, Rev. P.B. Zosapthara’n hun a hmang a. Chawhma session-ah 'Pastoral Ministry dinhmun thlirna (Hman leh tun)' tih thupui chu Rev. Vanlalzuata’n a sawi a, sawihona neih a ni a, chawhnu session-ah 'Pastoral Ministry-in harsatna a tawhte leh a hmachhawn dan' tih thupui chu Rev. Dr. Lalchawimawia’n a sawi a, sawihona neih leh a ni a. Zan inkhawmah Rev. Prof. Tlanghmingthanga’n hun a hmang a ni.
May 29, 2025 (Ningani) zingkar Sermon inkhawmah Rev. R. Lalrinsanga’n hun a hmang a. Chawhma session-ah 'Pastor-te tan lak ngaih zualna te' tih thupui Rev. Dr. K. Lalrinkima’n a sawi a, sawihona neih a ni a, chawhnu session-ah 'Kohhran mipuiin Pastor-te an beisei dan' tih thupui Upa Dr. Vanlalzara’n a sawi a, zawhna leh chhanna (General Discussion) hun hman a ni bawk. Zanah inthlahna hun hman a ni ang a, Rev. V.L. Luaia Hranleh, Senior Executive Secretary-in thuchah a sawi ang. Retreat hi May 30 (Zirtawpni) zing dar 8:00-ah a tiak ang.
Pastor Retreat hi kum 1967 atanga hman tan a ni a. Kum 1990 atangin kum khat kâr danah neih a ni a. Pastor-te tan intuaitharna hun pawimawh a nih avangin Pastor leh Pensioner ten an ngai pawimawh thin hle a ni.