Vawiin (June 2, 2025) chawhma dar 10 khan Devotion Hall, Synod Office-ah Synod Campus Ministry buatsaih Tleirawl leh Thalaite zawhna ‘Chhanna Dik’ lehkhabu tlangzarh a ni.
Tlangzarh inkhawm tawi hi Rev. H.L. Thianghlima, Campus Ministry Director-in a kaihruai a, Rev. Dr. Rosiamliana Tochhawng, Executive Secretary-in lehkhabu buatsaih a nih dan te a sawi hnuah Synod Campus Ministry buatsaih lehkhabu chu a chhiartu zawng zawngten chhanna dik an hmuh theuh theihna turin a tlangzarh a ni. Hemi hunah hian Synod Office-a thawktute bakah Synod Campus Ministry committee member leh lehkhabua thupui chi hrang hrang ziaktute an tel a ni. Lehkhabuah hian mi thiam hrang hrang ziak thupui pakua a awm a. Lehkhabu hi Rs.80/- man a ni a, Synod Bookroom hrang hrangah a lei theih ang.
March 21, 2025 (Zirtawpni) khan Campus Ministry buatsaihin pawl leh department hrang hrang sawmin J.M. Lloyd Hall, Synod Office-ah Seminar buatsaih a lo ni tawh a, Seminar-a thupui zir hrang hrangte chu Synod Campus Ministry Committee chuan lehkhabua chhuah a rel angin, a bua chhuah a ni ta a ni.
Synod Campus Ministry hian Pathian thu harsa hrilhfiahna ‘Hringnun zawhna ril’ tih chu kum 2015 khan a lo chhuah tawh a, ‘Tleirawlte dinhmun zirchianna’ tih lehkhabu pawh kum 2023 khan a lo tichhuak tawh a ni.
