Vawiin (June 13, 2025) chawhnu dar 2:00 khan Presbyterian Hindi Bible School (PHBS) te chuan Armed Veng Kohhran Hall-ah Graduation Day vawi 74-na an hmang a. Tun tumah hian zirlai 17 (mipa 13, hmeichhia 4)-in tha takin an zirchhuak a, zirlaite hi Mizoram leh Mission Field hrang hrang atanga rawn kal an ni.
Inkhawm hi Rev. R. Lalrinsanga, Principal-in a kaihruai a, inlawmna leh inhmelhriattirna a nei nghal a. Upa Lalthahluna Ralte, Coordinator, SMB-in Zirlai ti tha te hnenah Certificate a hlan a, Rev. R. Lalhmingsanga, Secretary, SMB-in zirlaite fuihna thuchah a sawi. Rev. Lalfakzuala, BEC Member-in zirlai chhuakte tawngtaisakna hun a hmang a, zirlai aiawhin Rubilal Hembrom, Jharkhand-in thu a sawi bawk. He hunah hian Nl. Jedidi Zothantluangi, Aizawl East Area Choir leh Synod Mission Choir te an zai a ni.
Presbyterian Hindi Bible School hi Synod Mission Board hnuaia hnamdang ringtharte rinna kawnga tihnghehna tura a din a ni a. August 24, 1990 khan hawn a ni a, September 15, 1990-ah zirlai mi 20 nen class tan a ni. Hun kal zelah Synod chuan India ram hmun hrang hrangah Mission Field a hawng ta zel a; chuvangin, State hrang hrang leh ram pawn - Nepal leh Bhutan atangte pawhin zirlai an lo kal thin a ni. A din tan kum 1990 atanga thla thum course ni thin kha kum 1998 atangin thla ruk course-a tih sei a ni a, kum khatah batch hnih neih thin a ni.
Kum 1990 atanga June 2025 thlengin zirlai 1889 (mipa 1446, hmeichhia 443) ten tha takin an zir chhuak tawh a, zirlai titha Top 3 te hnenah lawmman cash award pek thin a ni bawk.
For more Pics Click Here