July 6, 2025 (Pathianni) hi Health Sunday & Hospital Sunday (Damdawi In Pathianni) a ni a. Mizoram Presbyterian Kohhran chuan Hospital Sunday hi kum 1928 atangin a hmang tan a, kum 1981 atangin July thla Pathianni hmasa ber hi Hospital Sunday atan hman a ni.
Kum 1985 Synod Inkhawmpui thu angin 1988 atang khan January Pathianni hnuhnung ber chu Phâr Pathianni (Leprosy Sunday) atan hman thin a ni. Kum 2004 Synod chuan phâr pual chauh ni lovin natna dangte pawh huamin 'Health Sunday' tiin a thlâk ta a. Kum 2006 atangin Health Sunday hi hman tan a ni a. Health Sunday-ah hian Hriselna lam thupui chi hrang hrang zir thin a ni.
Kum 2008 Synod-in "Health Sunday leh Hospital Sunday hi Pathianni vawi khatah a ruala hman ni se" tia a rel angin kum 2010 atangin July Pathianni hmasa berah hman a ni ta a, chawhnu inkhawm hi Health Sunday pual, zan inkhawm hi Hospital Sunday pual a ni ta zel a ni. Zanah Hospital Sunday pualin thawhlawm lakkhawm a ni ang a, Hospital Charity Fund atan hman a ni ang.
Kumin Health Sunday & Hospital Sunday atan hetiang hian programme duan a ni:
Chawhnu Inkhâwm
Health Sunday Pual
Thupui : Stroke leh a inven dan
Zan Inkhâwm
Hospital Sunday Pual
Thupui : Tihdam rawngbawlna
Chhiar tur : Sam 103:1-5; Luka 4:40
Tun dinhmuna Synod Hospital, Durtlang leh John Williams Hospital, Lunglei-a thawktu awm dan chu hetiang hi a ni:
Synod Hospital, Durtlang
Khum awm zat : 355
Doctor : 37
Nursing Staff leh Sister : 155
College of Nursing : 24
Para Medical Staff : 41
Thawktu dang : 104
Thawktu zawng zawng : 361
John Williams Hospital, Lunglei
Khum awm zat : 30
Doctor awm zat : 4
Staff Nurse : 23
Thawktu dangte : 37
Thawktu zawng zawng : 64
Hospital Sunday 2025 Report & Thuchah Click Here
2025 Health Sunday & Hospital Sunday chungchang (Press Hand Out) Click Here