Synod Multipurpose Training Centre (SMTC) buatsaih Lay Leaders’ Training vawi 233-na chu July 16, 2025 (Thawhtanni) zan khan SMTC-ah hawnna inkhawm neih a ni.
Training hawnna inkhawm hi Rev. H. Lalmuanchhana, Director-in a kaihruai a, inlawmna leh report te ngaihthlak a nih hnuah Upa Vanlalsawma Siakeng, Synod Secrtetary-in training hawngin thuchah a sawi a, he hunah hian SMTC Hosteller leh Nl. Zomuansangi, Venghlui te an zai bawk.
Tun tum training-ah hian Presbytery 14 - Aizawl Hmar, Chhimphei, Champhai North, Lunglei East, Lunglei West, Aizawl Bethel, Tuichang, Tuichangral South, Chhimchhak, Aizawl Chhim, Sakawrhmuituai, Serlui, Aizawl West-II leh Tlawng atangin Kohhran Upa 46 an tel a ni.
Kohhran Upate tana Lay Leaders’ Training hi kum 1996 atang khan neih tan a ni a, training-ah hian Kohhran Upate tan Kohhran enkawl dan leh inrelbawlna lam atana pawimawh chi hrang hrang bakah Kohhran thlarau lam nun enkawl dan te zir thin a ni.
Training hi July 25, 2025 (Zirtawpni) zanah kharna hun hman a ni ang.
Synod Multipurpose Training Centre (SMTC) hi kum 1993 Synod-in din tura a rel angin January 12, 1996 khan din a ni a, a tira a hming chu Christian Multipurpose Training Centre tih niin kum 2001 Synod khan a hming hi Synod Multipurpose Training Centre tiin a thlak leh a ni. Synod Multipurpose Training Centre (SMTC) hnuaiah hian thalaite’n mahni kuta eizawnna kawng an lo neih ve theihna tura training chi hrang hrang (Vocational Training) buatsaih thin a ni bawk a, tunah hian trade chi hrang panga – Tailoring, Computer, Mobile repairing, Beauty Culture leh Electrical te kalpui mek a ni a, zir chhuak tawh mi 1885 awmin tunah hian zirlai 105 an awm mek a ni.
