Revival
Mizoram sorkar, tlawmngai pawl leh kan kohhran tangkawpin Hulhliap Short Stay Centre a buatsaih thawh hnihna chu July 21, 2025 (Thawhtanni) atang khan tan a ni leh ta a. Hei hian August 9, 2025 thleng a awh dawn a ni.
Synod Revival Camping Centre, Neihbawia buatsaih Hulhliap Short Stay Centre thawh hnihnaah hian mi 536 an inziak lut a, camping centre-in a dawl zawh loh avangin pawn lamah riahna turte siam belh a, a chung zar ni mah se, July 21 (Thawhtanni) zana ruah sur nasain a tichhiat avangin an buai hle. Mut bu leh thawmhnaw huh vek an tam avangin a then chu an haw leh hlawm a, July 22 (Thawhlehni) thlengin mi 410 vel an la awm a ni.
Tarlan tawh thin angin Hulhliap Short Stay Centre hi nakkum March thla thleng buatsaih tura ruahman a ni.
Worship
July 17-18, 2025 chhung khan Zai hruai training neihpuiin Chawngtlai leh Kelkangah Tv H. Lalthazuala, Music Instructor leh K. Lalhmangaihzuala, trainer te an kal.
Social Front
July 19, 2025 (Inrinni) khan Synod Rescue Home Management Committee, Champhaiah neih a ni a, committee zawhah hian Synod Rescue Home Director Quarters thar hawnna programme hman nghal a ni a, quarters thar hi Rev. Dr. K. Lallawmzuala, Executive Secretary-in Pathian hnenah hlanin a hawng a ni. Hemi hunah hian Rev. H.S. Remmawia, Director, Synod Rescue Home, Durtlang leh Pu Lalchhungliana, Social Front Coordinator te an tel bawk.
Kristian Thalai Pawl
July 19, 2025 (Inrinni) khan Sumsuih Bial KTP Leadership Training neihpuiin committee member-te, Tv. P.C Lalthanmawia leh Pu Lalduhawma Chhangte te an kal.
SL&PB
July 17, 2025 (Ningani) zan khan Thingsulthliah Kohhranah Literature Seminar neiin Rev. PB Zosapthara, Editor leh Pu Zohmangaiha, Asst. Editor te an kal.
MSSU
July 19, 2025 (Inrinni) khan Sunday School Zirtirtu training neihpuiin trainer-te hetiang hian an chhuak:
Leitan South kohhranah Upa K.Zzoremsanga leh Upa R. Vanlalhruaia.
Tlungvel Venghlun Kohhranah Upa S. Kapzathanga, Upa C. Lalbiaksanga leh Upa Lalchuailova.
Vairengte Chhimveng Bialah Upa Hrilthansanga, Upa Lalsiammawia Pachuau leh Upa John Lalnunthara.
Kohhran Hmeichhia
July 20, 2025 (Pathianni) khan Chanmari West Bialah Kristian Chhungkaw Campaign neiin Central Kohhran Hmeichhe Hruaitute, Pi Vanlalthlamuani, Vice Chairman, Pi Zothanpari, Ex-Officio leh committee member-te, Pi R. Tlanghmingthangi, Pi Lalhlimpuii leh Pi Lalramngaii te an kal.
Trust
July 21, 2025 (Thawhtanni) khan Ruantlang Pastor Quarters, Khawzawl Venglai Pastor Quarters leh Khawzawl Dinthar Pastor Quarters te cheithat ngai leh lungrem chim siam that dan tur en felin Pu Lalramenga Royte, J.E a kal.
Mizoram Christian College (MCC)
July 18, 2025 (Zirtawpni) khan MCC IQAC leh Environment Information Awareness, Capacity Building and Livelihood Programme (EIACP), Mizoram Pollution Control Board tangkawp chuan MCC 3rd Semester zirlaite tan ‘Environment Awareness and Sensitization Programme’ an buatsaih a, Er. Benjamin Lalnunsanga Colney, Programme Officer, EIACP chu Resource Person a ni.
July 18, 2025 (Zirtawpni) khan MCC NSS Unit bul tumin Co-Curricular Activities (CCA) hunah 5th Semester zirlai zawng zawngten ‘Faina hnatlang’ an nei a, Mission Vengthlang khawlai bawlhhlawh an thian fai.
July 18, 2025 (Zirtawpni) khan 1st Semester zirlaite tan ‘Mentoring Programme’ hun hman a ni. Mentoring Programme-ah hian zirtirtu tinin zirlai enkawl bik neiin – zirna, chhungkua leh sum lama an harsatna hrang hrangte sawipuiin a sut kian dan tur theihtawpin an ngaihtuah pui thin.
July 19, 2025 (Inrinni) khan MCC NSS Unit chuan Main Campus, Tanhril-ah thingphun hnatlang an nei a, thing 20 chuang an phun.
July 19, 2025 (Inrinni) khan Mizo Department chuan Off Campus class hun an hmang a, he hunah hian zirlaite chu kut hnathawh zirtirin ramah an chhuak a, mautuai khawrhin hun an hmang.
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
Chhiahtlang Venghluna damlo mi pahnih hnenah Rs.10,000/- ve ve, Sairang Dinthara damlo mi pakhat hnenah Rs.10,000/-, West Serzawla damlo mi pakhat hnenah Rs.10,000/-, Hmunpui khuaa damlo mi pakhat hnenah Rs.10,000/- leh Khamranga khawsak harsa chhungkaw pakhat hnenah Rs.10,000/- pek a ni.