August 22, 2025 (Zirtawpni) khan Presbyterian Bible School (PBS) chuan Batch 61-na pualin Farewell and Dedication Programme, Pi Zaii Hall, Synod Conference Centre, Mission Vengah an hmang.
Programme hi Rev. Lalengzika, Principal-in a kaihruai a, Rev. K. Lalthlengliana, PBS zirtirtuin report a pe a, Rev. Dr. Rosiamliana Tochhawng, Executive Secretary i/c PBS-in zir chhuakte hnenah Certificate hlanin thuchah a sawi a, exam-a ti thate hnenah Rev. B. Zohmangaiha, Synod Secretary (Jr.)-in lawmman a hlan a, class kai kim te hnenah Rev. Lalremliana, PBS committee member-in lawmman a hlan a, Pu C. Awithanga Award chu Pi R. Laltanpuii’n a hlan bawk.
PBS-ah hian a din tirh atangin tun thleng hian zirlai 2845 an awm tawh a, chung zinga 2380 chuan tha takin an pass tawh a. Tuna batch 61-naah hian zirlai 40 an awm a, zirlai 29-in tha takin an pass a ni.
Exam-a ti tha zual pathumte hnenah lawmman Rs.1000/-, Rs.700/-, Rs.500/- leh lawmpuina thuziak PBS Committee hminga hlan a ni a, chungte chu:-
1-na – Reuben Lalmuansanga s/o C. Lalramhluna, Thingsulthliah Kohhran
2-na – Zion Lalramhlunchhunga s/o H. Lalrinchhunga, Tualte Kohhran
3-na – Christina V.L. Chhandami d/o Lalramchhana, Hlimen Damveng Kohhran te an ni.
Batch 61-na zirlai zingah hian class kai kim mi pali hnenah lawmman Rs. 500/- theuh hlan a ni.
Kum 2014 atangin Christian Theology subject leh Kohhran Inrelbawlna & PCI Danpui subject-a ti tha ber te hnenah Pu C. Awithanga Award hlan thin a ni a. Batch 61-naah hian Kristian Theology subject-ah Lalparmawii Sailo-in a dawng a, Kohhran Inrelbawlna & PCI Danpui subject-ah Reuben Lalmuansanga’n dawng a, award hian Rs. 2000/- a keng tel a ni.