Vawiin (Aug. 26, 2025) chawhma dar 10 khan Synod Office Devotion Hall-ah Synod Telephone Directory 2025 chu Rev. Dr. Rosiamliana Tochhawng, Executive Secretary-in a tlangzarh.
Tlangzarh inkhawm tawi hi Pu Lalniliana, Synfo Coordinator-in a kaihruai a, Directory siam a nih dan report tawi a pek hnuah Rev. Dr. Rosiamliana Tochhawng, Executive Secretary i/c Synfo-in Pathian hnena hlanin a tlangzarh a ni. Synod Telephone Directory hi Kohhran tin leh Synod hnuaia Department tinten copy khat zel Synod Office-a Mamawh lamnaah lam theih a ni ang a, hei bakah hian a mamawh leh duh apiang tan Synfo Department, Synod Office, Annex Building-ah Rs.60/-in a lei theih a ni.
Synod Telephone Directory hi kum 1996 atang khan buatsaih tan a ni a. Hotute an inthlak kum apiangin Edition thar buatsaih a ni deuh zel a. Amaherawhchu, kum 2016-a Directory tihchhuah, Ninth Edition bak kha chu a hnuah tihchhuah a la ni leh ta lo a ni.
Directory thar hi tun hmaa Synod Directory lo chhuak tawhte ai chuan a bu a chhahin phek 353 lai a ni a. Hetia a chhah tak viauna chhan chu Directory hmasaa a la tel ngai lo, Pro Pastor leh Missionary zawng zawng dah luh thar an ni a, a hmaa Aizawl khawpui bik chauha Kohhran Committee member te dah luh thin kha Presbytery zawng zawng leh India ram khawpui liana Kohhran Committee member-te dah luh vek an nih tak vang a ni a, a bak thil thar eng emaw zat dah luh belh a ni bawk.
October 4, 2024 khan Synod Phonebook, Mobile Application, Android Version bik chu Synod Moderator-in a lo tlangzarh tawh a. Hei hi Siruk Firm, Chaltlang ten a thlawn vekin an siam a ni. A tira tlangzarh tak hi Android version niin tlangzarh a nih hnu hian tum hnih upgrade version tih chhuah tawh a ni a, tun tanga rei vak loha hian upgrade version tih chhuah leh tum mek a ni. iPhone hmangtute tan iOS version pawh July 30, 2025 khan hman theiha chhawp chhuah a lo ni tawh bawk.
For more Pics Click Here