Mizoram Christian College (MCC)
1. September 22, 2025 (Thawhtanni) khan MCC NSS unit-te chuan My Bharat portal-ah "Mass Registration Drive" hun an hmang a. He hun hi Dr. Lalrinmawia, NSS State Nodal Officer-in a hmanpui a ni. Tin, heng bakah hian Vikshit Bharat Youth Quiz chhanna neih nghal a ni a, student tithate chuan NSS Mizoram ai an awh ang. NSS Unit MCC hian Unit 3 neiin - thisen pek, vantlang hmun tihfai leh College hmunhma tihfai te an hmalakna langsar a ni.
2. Mizo Students Union (MSU)-in an buatsaih LESDE UPSC Challenge Inter-College Quiz Competition 2025-ah Mizoram Christian College chu pakhatna an ni. He Quiz Competition-ah hian Mizorama College hrang hrang 14 an tel a, intihsiakna round li neih niin September 17, 2025 atang khan neih tan a ni a, September 27, 2025 (Inrinni) zan khan College pathum – Govt. Hrangbana College, Govt. Serchhip College leh Mizoram Christian College te chu Final-ah an intum a. Mizoram Christian College aiawha zirlai telte hi - Remsiamkima, 5th Semester, Department of Management leh Rohmingliana Renthlei, 5th Semester, Department of Political Science te an ni.
Campus Ministry
September 24 – 26, 2025 chhung khan "Gospel Week" hmanpuiin Synod Home Mission School, Khawmawiah hun an hmang a. He hunah hian Tv. Lalrinchhana, Counselor bakah, Resource person atan Pu C. John Saiparliana leh Pi Lalsiamthari te an kal.
Gospel week hi ni thum chhung hman a ni a; thupui hrang hrang hmanga zirtirna pek an nih bakah, zai leh lama Pathian fakin hun an hmang thin a ni. Gospel Week chhung hian Pathian venna leh malsawmna an dawng nasa hle a ni.
Worship
September 26-28, 2025 chhung khan Dimapur, Nagaland-ah Music Training neihpuiin Tv. H. Lalthazuala, Music Instructor a kal.
Social Front
September 27-28, 2025 chhung khan Bulfekzawl Kohhranah Moral Reforms, Seminar leh Awareness Campaign neiin campaigner-te, Upa H. Lalhmingmawia leh Upa P.C. Lalrinawma te an kal.
Finance
September 27, 2025 (Inrinni) khan West Phaileng Bialah Sum Vawn Dan Training neihpuiin thawktute, T.Upa R. Lalbiakdika leh Pu Lalhruaizela Ralte te an kal. 
SL&PB
September 27, 2025 (Inrinni) khan Falkawn Hmar Veng Kohhranah Literature Seminar/Campaign neiin Rev. Dr. K. Lallawmzuala, Executive Secretary leh Pu Lalremmawia, O/A te an kal. 
Kohhran Hmeichhia
September 27, 2025 (Inrinni) khan Melriat Bialah Leadership Training neihpuiin Pi K. Vanlalrawni, Chairman leh Pi P.C. Lalmalsawmi, committee member-te an kal.
Lehkhabu tlangzarh
Mêlriat Presbyterian Kohhran, Kristian Chhûngkaw Committee buatsaih, CHHÛNGKAW DAMNA tih lehkhabu chu September 28, 2025 (Pathianni) khan Bialtu Pastor, Bial Chairman ni bawk, Rev. Dr. L.H. Rawsea’n a tlangzarh. He lehkhabuah hian tunlai huna Pathianin a hman mek mi hrang hrangte sermon 15 a chuang a, phek 155-a chhah a ni. Kristian Chhungkaw din nghehna kawnga lehkhabu tangkai tak tur a ni ang.
Mêlriat Kohhran hi kum 1952 khan din a ni a. Kristian Chhungkaw Ni an ngai pawimawh tharin tun hnaiah phei chuan ‘langsar’ takin an hmang thin.
Kumin 2025 Kristian Chhungkaw Ni pawh, Life skills leh Counselling & Family therapy lama thiamna bik nei, Pathian mi hman tak, Pi V. Vanlalruati chu Speaker-ah hmangin hun an hmang a ni.
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
West Serzawl khuaa damlo mi pathum hnenah Rs.10,000/- theuh, N. Hlimena damlo mi pahnih hnenah Rs.10,000/- ve ve, Buang khuaa damlo mi pahnih hnenah Rs.10,000/- ve ve, Sailutar khuaa damlo mi pakhat hnenah Rs.10,000/-, Saikhawthlir Vengthara damlo mi pakhat hnenah Rs.10,000/-, Dampa Tlangnuama damlo mi pakhat hnenah Rs.10,000/-, Venghnuaia khawsak harsa chhungkaw pakhat hnenah Rs.10,000/-, Saitual Bethel-a vanduaina tawk chhungkaw pakhat hnenah Rs.10,000/-, Kolasib vengthara khawsak harsa chhungkaw pakhat hnenah Rs.10,000/- leh Phainuam khuaa damlo mi pakhat hnenah Rs.10,000/- pek a ni.