Rev. Sanghnuna (kum 88) pensioner chu October 10, 2025 tlai dar 4:40 p.m. khan a boral a, vawiin (Oct. 11, 2025) chawhnu dar 2:00 khan Ramhlun North Kohhran Biak Inah Rev. R.C. Lalnghakliana, Synod Moderator-in a vui a ni.
Pian leh mûrna
Rev. Sanghnuna hi Pu Lianhrima (L) leh Pi H. Kungi (L) te fa pasarih zinga parukna a ni a, April 8, 1937-ah Vangtlang khuaah a lo piang a, an unau indawt dan chu hetiang hi a ni:
1. Lianthangi (L)
2. Lianngenga (L) h/o Hrangzuali(L)
3. Rotuaki (L) w/o Chalrothanga (L)
4. Hrangkhama (L) H/o Siruali(L)
5. Thangngura (L)
6. Sanghnuna h/o Rozamliani
7. Lianmawii w/o Laitawna(L)
Kum 1967 March ni 8-ah Rozamliani d/o Vanlalliana, Hortoki nen inneiin fa 5 (panga) an nei a, pathum an boral tawh a; tu pathum a nei.
Zirna lam
Rev. Sanghnuna hian Vangtlangah Primary School a zova, Sialhawk khuaah Middle School a zo leh a. Kum 1962-ah Biate High School-ah pawl kua thleng a zir leh a. Pawl kua a zir kum hian Pathian thu zirin a kal ta ni. Kum 1961-ah Pathian thu zir dilin lak a ni lova, Kum 1962-ah a dil leh a, lak zingah a tel ve ta a. Kum 1963- 1965 chhung zirin rawngbawlna puitlingah a lut ta a ni.
North Vanlaiphai Biala a awm lai, kum 1982 khan B.Th. zir tura thlan a ni a. Kum 1983-ah North Vanlaiphai Bial chu a chhuahsan a, amaherawhchu June thla atang chauha zir tan tur a nih avangin January-May, 1983 chhung chu Vanzau Bial a enkawl leh phawt a, June 1983 atangin B.Th. hi a zir leh ta a ni.
Rawngbawlna lam
Kum 1965 Synod Inkhawmpui chuan Pro. Pastor atana lain, kum 1966 atangin Lêngpui Pastor Bial chhûnga thawk tûrin Hortoki khuaah a dah a. Pro. Pastor hna a thawh tan kum, kum 1966-ah ram a buai tak avangin Kohhrante pawhin an tuar hle a. Hemi kuma Pastor Conference hmanga a kal tur chu sipaiin an man a, jail-ah a tang a, jail atanga a chhuah hnu hian ATC Office-ah dah a ni a.
Kum 1966 Synod Inkhawmpui chuan Kêlkâng Pastor Bial chhûngah, Pastor Tailinga hnuaia Pro. Pastor hna thawk tûrin Khuangleng khuaah a sawn a. Kum 1967 Synod Inkhâwmpui chuan ‘Rawngbâwlna a hautak si, Bial khua a tamin indaih loh a na si, Pro. Pastor-a kum hnih thawk tawh chu nemngheh mai ni se’ tiin a rêl a. Kum 1968, June 1&2-a Dâwrpui Biak Ina Special Synod Inkhâwmpui neihah Pastor atan nemngheh a ni.
A awm tawhna Bialte:
1. 1966 : Lengpui Bialah Pro. Pastor-in
2. 1967 : Kelkang Bialah Pro. Pastor-in
3. 1968-1978 : Saitual Bial
4. 1979-1982 : North Vanlaiphai Bial
5. 1983 : Vanzau Bial
6. 1987-1990 : Sihphir Bial
7. 1991-1997 : Ramhlun North Bial
Kum 1998 January khan Superannuation Pension-in a chhuak.
Synod hnuaia chanvo a chelh leh committee-a a lo tel tawh dan :
1) Synod Statistician - 1997
2) SEC - 1970-1979, 1981-1983, 1989-1991
3) Synod Nomination - 1988-1992
4) Pastoral - 1971-1973, 1975-1977, 1981-1983
5) SMB - 1971-1976
6) Music - 1969-1971
7) Finance - 1969-1970, 1989-1991
8) SL&PB - 1995-1997
9) PRESCOM - 1998-2000
Presbytery Moderator vawi ruk a ni tawh a, Presbytery Statistician pawh tum 2 a ni tawh. Bial Chairman-ah vawi kua a tan tawh bakah, Synod dangahte pawh Synod aiawh palaiin a kal tawh bawk. Pastor hna a thawh chhûngin nupa tuak 525 a inneihtîr a, mi 4,435 a baptis a ni.
Rev. Sânghnûna hi Saitual Biala a awm lai hian zirtîrna dang Mizo Evangelical Association (MEA) a ding a. Chu zirtîrna chuan a Bial chhûng kohhrante a tibuai a, a bîk takin a awmna Saitual khawpui chhûng kohhrante chu a tibuai zual hle nghe nghe a. MEA zirtîrna a sosân lai chuan rawngbâwlna chawlhtîrte pawh an nei nual a; mahse, vânneihthlâk takin, zawi zawiin MEA zirtîrna chu a inher rem leh hret hret a, rawngbâwlna an chawlhtîr ngeite pawh an phelh a, tha takin, tumah kohhran chhuahsan awm lovin an hruai lût leh vek a ni.
Thuchah a ngaih pawimawh em emte hi kawng thum lian pui puiin a khai khâwm theih: Krista Rilru - Thuawihna, Inngaihtlawmna leh Thuhnuairawlhnate hi a ni. Rev. Sânghnûna hi rual pâwl thiam, mi hlim thei, rorêl lam ngai pawimawh leh rawngbâwltu puitling tak a ni.
Hun hnuhnung lam
Pathian rawngbawla hun a hman chhung hian Pathian zarah a hrisel hle a, vawi khat chiah damdawi in luh ngaiin a awm a. A pension hnu pawhin Darlung Pastor Bial vilin a awm leh a, mahse BP sang leh Gout a lo neih ve avangin a chhunzawm thei ta lova, chuti chung chuan khawhar in kal leh chhungte tlawh kualah chuan chhungkaw aiawhtu ber a ni reng thin. April ni 1, 2016 khan tlu sual palhin a khup ruh a sawh a, Synod Hospital Durtlangah zai a ni a. Dam taka damdawi in chhuahsanin tun hma ang ni tawh lo mah se, inkhawm leh tul zualah chuan a la chhuak vâk thei thin. Amaherawhchu, a kum te a lo tam ve tak avang leh a BP sangin a tihbuai ve reng avangin pawn a chhuak tlem ta deuh thung.
March 15, 2018 khan natna hrang hrang avangin Synod Hospital Durtlangah admit a ni a, tlema enkawl deuh a ngaih avangin ICU-ah dah a ni a. Thla khat lai damdawi ina a awm hnuah dam taka lo chhuak lehin Pathian Biak In pawh a thleng leh thei a. Hemi hnu hian Minor Stroke a nei leh a, harsatna dang em em nei zui lovin chet erawh a harsat ve deuh.
Sept. 2024 khan a zing tho chu a chet hleih theih loh avangin Synod Hospital Durtlang panpui leh a ni a, a stroke a ni tih hriat chhuah a ni a; a pang dinglam chêt zui tha thei lovin in lamah pawh enkawl deuh chawt a ngai zui ta a ni. Sept. 28, 2025 zanah BP sang avangin a buai leh a, Sept. 29-ah Synod Hospitalah admit a ni leh a. Mahse Oct. 3 zing dar 2:00 velah a BP rawn sang thutin biak theih lohin a awm a, investigation tih anih hnuah Stroke a nei leh tih hriat chhuah a ni a. Synod Hospital Durtlangah ICU khum awl a awm remchan loh avangin City Hospital, Mission Vengah refer a ni a, Ventilator nen enkawl nghal a ni. Doctor leh Nurse ten a nunna chhan tuma theihtawp an chhuah chungin Oct. 10, 2025 tlai dar 4:40pm khan a rawng a bawl thin Lalpa hnena chawl turin a kal ta a ni.
VUINA PROGRAMME
A hmun : Ramhlun North Kohhran Biak In
A hun :11.10.2025 (Inrinni) Dar 2:00 PM
Vuitu : Rev. R.C. Lalnghakliana, Synod Moderator
Chanchin sawi : Upa Vanlalsawma Siakeng, Synod Secretary
Zaipawl : Ramhlun North Kohhran Zaipawl
Thlamuanna thuchah : Rev. R.C. Lalnghakliana Synod Moderator
Tawngtaisaktu : Rev. Thangzauva
Zaipawl : Ramhlun North Bial Zaipawl
Hla sak ho : ‘Khawvel hi bo mah se’ KHB No. 150
Malsawmna : Rev. B. Sangthanga
Thlanmual Hun hmangtu : Rev. R. Ramnghinglova, Bialtu Pastor, Ramhlun North