November 11-13, 2025 chhung awh tur Synod Executive Committee vawi 315-na chu J.M. Lloyd Hall, Synod Office-ah neih mek a ni. Meeting hi Rev. R.C. Lalnghakliana, Synod Moderator-in a kaihruai a, Upa Vanlalsawma Siakeng, Synod Secretary-in report a pe a, Rev. Dr. K. Lallawmzuala, Finance Officer-in report a pe bawk.
Secretary report-ah hian Tedim hla bu buaipui sak a nih thu te, Mizo mipa thi rate sang mek tih ziaawm dan kawng zawnna atana Bookmark leh Leaflet peih fel a nih thu leh Kohhran tinah a copy sem a nih tawh thu te, October 2-5, 2025 chhunga PYF 25th Biennial Conference cum Golden Jubilee YRC, Falkland-ah neih a nih thu te, Bangalore North Kohhran indan anih thu te leh Health Care chungchanga Mizoram Synod leh Mizoram Sawrkar nen inremna thuthlung ziah a nih thu te tarlan a ni. 
Tun tumah hian thurel tura chhawpchhuah 67 a awm a, chung zingah chuan Executive Secretary-te hna chanpual ennawn chungchang te, ATC Principal leh MTC Principal thlan chungchang te, PC Girls’ School Headmistress thlan chungchang te, Synod Pension Dan 2024 en that chungchang te, Home hrang hrang nasa zawka tanpui chungchang te, Asia chhimchhaka Pastor rawngbawl dan tur kaihhruaina chungchang te, SL&PB inkaihhhruaina chungchang te, Synod Press Building chungchang te, Sikulpui Headmaster tur chungchang te leh Kristian Hla Bu ennawn chungchang te chu a langsar zualte an ni.
For more Pics Click Here