Vawiin (Dec.9, 2025) atang hian Synod Inkhawmpui vawi 102-na chu Zarkawt Kohhran Biak Inah neih tan a ni ta. Inkhawmpui hian Dec. 14, 2025 (Pathianni) thleng a awh ang.
Chawhma dar 9:30 atang khan Nomination Committe an thu tan a, tlai dar 4:00 thleng a awh ang. Zan dar 6:30-ah Vantlang Pathian Biak Inkhawm neih a ni ang a, hetah hian inlawmna leh Kohhran chanchin report ngaihthlak a ni ang.
December 10, 2025 (Nilaini) chawhma dar 9:30 atangin Synod Rorel tan a ni ang. Tun tumah hian general agenda 43 awmin, SEC/Boards atanga thu lut eng emaw zat a awm bawk. Synod Rorel hian December 13, 2025 (Inrinni) thleng a awh ang.
Kumin Synod Inkhawmpui Thlarau lam thupui chu 'Chhuan tur dik' (Gal. 6:14) a ni a, December 13 (Inrinni) zanah Rev. Dr. H. Vanlalruata, Chanmari-in thupui hi a sawi ang.
December 14, 2025 (Pathianni) chawhma chu Pastor nemngheh leh Pro. Pastor ruat inkhawm a ni ang a. Chawhnu chu Lalpa Zanriah Sakramen inkhawm a ni ang a, zan Inkhawmah Moderator valedictory sermon ngaihthlak a ni bawk ang.
Kumin 2025 Synod Inkhawmpuia Puipa turte chu heng te hi an ni :
Moderator : Rev. John Raldosanga
Secretaries : Upa Vanlalsawma Siakeng (Sr.)
Rev. B. Zohmangaiha (Jr.)
Finance Officer : Rev. Dr. K. Lallawmzuala
Rev. Vanlalzuata
Statistician : Upa Dr. Vanlalzara
Sr. Exe Secretary : Rev. V.L. Luaia Hranleh
Executive Secretary : Rev. Dr. Rosiamliana Tochhawng
Synod Inkhawmpui hi kum 2010 atang khan Bial-in an thleng tan a, kumin 2025 hian Dawrpui Pastor Bialin Zarkawt Kohhran Biak Inah an thleng a ni.
Synod Rorel-te hi Mizoram Synod media - mizoramsynod.org, Synod Information Whatsapp channel leh Instagram lamah te puan zar thin a ni ang a. Vantlang Pathian biak inkhawm zawng hi Synod Information YouTube leh Hruaina Eng TV-ah te LIVE TELECAST a ni bawk ang.
SYNOD INKHAWMPUI 2025 : ROREL NI 1-NA
December 10, 2025 (Nilaini) | Synod Information & Publicity
December 10, 2025, chawhma dar 9:30-ah inkhawmpui tan a ni a. Palai lawmna, Synod pawn palai lawmna leh inkhawmpui chibai bukna neih a ni. He mi zawh hian Moderator tang lai Rev. R.C. Lalnghakliana chuan Rev. John Raldosanga hnenah Moderator mawhphurhna a hlan.
Nomination thu ngaihthlak a ni a, kum 2026 Synod Inkhawmpui programme leh puipa turte pawm a ni. Puipa turte chu
Moderator - Rev. R. Lalrinsanga, MSK
Secretary (Sr.) - Rev. B. Zohmangaiha, MTC
Secretary (Jr.) - Upa C. Lalduhawma, Synod Office
Finance Officers - 1. Rev. Dr. K. Lallawmzuala, 2. Rev. Vanlalzuata
Statistician - Rev. Lalsangmuana, Bethlehem
Sr. Executive Secretary - Rev. V.L. Luaia Hranleh
Executive Secretary - Rev. Dr. Rosiamliana Tochhawng
Kum 2026, 2027 leh 2028 inkhawmpui thlengtu tur chu inkhawmpui hmasa lamah tihfel a lo ni tawh a. (2026 - Chanmari Pastor Bialin Chanmari Kohhran Biak Inah, 2027 - Ramhlun North Pastor Bialin Ramhlun North Kohhran Biak Inah, 2028 - Republic Veng Pastor Bialin College Veng Kohhran Biak Inah). Kum 2029 Synod Inkhawmpui chu Electric Veng Pastor Bialin Electric Veng Kohhran Biak Inah an thleng ang.
Kum 2026-a Pastoral Ministry thupui atan 'Thlarau leh tih tak zeta Pathian biak' (Johana 4:24) pawm a ni a, Pro. Pastor pawh mi 15 lak tura pawm a ni bawk.
Pastor Bial thar 7 hawn tura pawm a ni a. Chu'ngte chu Pastoral hnuaiah Salem Veng Bial, Falkland Bial, Champhai Zotlang Bial leh Dolchhora Bial, Synod Mission Board hnuaiah Koreng Bial, Ranchi Bial, Masihi Sangati Serchhip Pastor Bialte an ni. Hetih lai hian Presbytery hawn thar tur a awm lo.
Nepal Mission Field chhunga Tarahara Bial station chu Salakpurah sawn niin, bial hming pawh Salakpur Pastor Bial tia thlak a ni a. Odisha Mission Field chhunga Adava Pastor Bial thut hmun chu Duringuda-ah sawn a ni a, Duringuda Pastor Bial tia hming thlak a ni bawk. Bangalore North Mizo Presbyterian Kohhran chu bial thut hmun atan pawm a ni.
Minister, Pastor leh Pro. Pastor-te awmna tura Pastoral-in ruahmanna a siamte chu inkhawmpui hian a pawm a. Sipai Pastor-a lut an awm theih nan Synod-in a buaipuitu tur ruat tha tih a ni a, SEC hmalak turin dah a ni.
Dar 4:25-ah rorel zawh a ni a, Rev. Zawlthuama'n malsawmna sawiin rorel ni hmasa ber a tin.
SYNOD INKHAWMPUI 2025 : ROREL NI 2-NA
December 11, 2025 (Ningani) | Synod Information & Publicity
December 11, 2025, chawhma dar 9:30-ah Rev. John Raldosanga, Moderator-in Pathian thu Sam 37:28-29 a chhiar a, Upa C. Dorema, Kulikawn Vengthlang a tawngtai.
ROREL 1-NA : 'Masihi Sangati puala Falkawna ram neih' rawtna, Chhimphei Presbytery atanga lut chu Synod Mission Board-in a tul anga a ngaihtuah theih a ni e, tih a ni.
ROREL 2-NA : Aizawl Central Presbytery atanga lut, 'India rama sakhaw zalênna a awm zel theih nana hmalak' chungchang chu tha tih a ni a, SEC bawh zui tura dah a ni.
ROREL 3-NA : Lunglei East Presbytery atanga lut, 'KTP member a bika thlan chhuah Synod châwma Coaching Centre hming thaa inluhtir' chungchang chu hmalak mekna hi a tawk e, tih a ni.
ROREL 4-NA : 'Krismas puala Charity Fund siam' rawtna, Dampa Presbytery atanga lut chu sawihona hi a tawk e, tih a ni.
ROREL 5-NA : 'ATC-a Pathian thu zirlai Synod Sponsor tihtlem' rawtna, Aizawl Chhim Presbytery atanga lut chu kal dan pangngaia kal zel tha tih a ni.
ROREL 6-NA : 'SL&PB lehkhabu chhuah a thlawna inpek tihtawp' rawtna, Aizawl Bethel Presbytery atanga lut chu a lo luh ang hian tihtawp ni rawh se, tih a ni.
ROREL 7-NA : Aizawl East Presbytery atanga lut, 'PET Scan khawl lei' rawtna chu tun dinhmunah chuan kan tlin rih lo e, tih a ni.
ROREL 8-NA : 'District Hospital lian zuala Chaplain dah' rawtna, Champhai North Presbytery atanga lut chu tun dinhmunah chuan kan la tlin rih lo e, tih a ni.
ROREL 9-NA : Tuichangral Presbytery atanga lut, 'Sakramen chhang inang tlang neih' chungchang chu kal dan pangngai hi a la tha e, tih a ni.
ROREL 10-NA : 'HIV/AIDS inzirtirna Naupang Sunday School zirlaia telh' chungchang, Tuivai Presbytery atanga lut chu hmalak mekna a ni e, tia inhrilhfiah a ni.
ROREL 11-NA : 'Chak zawka Synod Office atanga lehkha thawn chhuah theih nana hmalak' rawtna, Lunglei East Presbytery atanga lut chu hmalak mekna a ni e, tia inhrilhfiah a ni.
ROREL 12-NA : 'Synod rêl leh hmalakna Dept pakhatin tih tawp mai loh' chungchang, Aizawl East Presbytery atanga lut leh Aizawl Bethel Presbytery atanga lut, 'Synod Inkhawmpui thu pass tawh bawhzui loh awm thin' chungchang chu sawi kawp a ni a. He mi kawngah hian department tinte chu fimkhur taka kal tura inchah a ni.
ROREL 13-NA : 'Pastor Biala Masihi Sangati leh Pastoral Ministry-te thawhho dan mumal zawk siam' chungchang, Sakawrhmuituai Presbytery atanga lut chu a tha a, SEC bawh zui tura tih a ni.
ROREL 14-NA : 'Missionary lak dan en that' rawtna, Tuipuiral Presbytery atanga lut chu kalpui mek a ni e, tia inhrilhfiah a ni.
ROREL 15-NA : Aizawl West II Presbytery atanga lut, 'Missionary pakhat châwm nana Rs. 1,000 bituk ennawn' rawtna chu kal dan ngai hi a la tha e, tih a ni.
ROREL 16-NA : 'Missionary leh Field Worker te hlawh pek' chungchang, Kolasib Presbytery atanga lut chu kal dan pangngai hi a la tha e, tih a ni.
ROREL 17-NA : 'Synod Nomination Committee member tihpun' rawtna, Teirei Presbytery atanga lut chu dan hman mek hi a la tha e, tih a ni.
ROREL 18-NA : Aizawl Central Presbytery atanga lut, 'Aizawl Central Presbytery huam chhunga Counselling Centre din' rawtna chu tun dinhmunah chuan din rih loh tura tih a ni.
ROREL 19-NA : Aizawl East Presbytery atanga lut, 'Hnathawh uar tur leh taima tura inzirtir' chungchang chu Social Front Committee-in tualchhung Kohhrante hmalak dan tur ruahmanna rawn siam rawh se, tih a ni.
ROREL 20-NA : Mizoram pawna Synod hnuaia thawktute tan emergency passage ruahmanna siam chungchang, Zoram Pawn Presbytery atanga lut chu sawihona hi a tawk e, tih a ni.
Dar 4:20-ah rorel zawh a ni a, Rev. Lalrinawma'n malsawmna sawiin rorel ni hnihna a tin.
SYNOD INKHAWMPUI 2025 | ROREL NI 3-NA
December 12, 2025 (Zirtawpni) | Synod Information & Publicity
December 12, 2025, chawhma dar 9:30-ah Rev. John Raldosanga, Moderator-in Pathian thu Amosa 5:24 a chhiar a, Upa H.C. Thanchungnunga, Lunglei Chanmari a tawngtai.
ROREL 21-NA : 'Chanchin tha thlen ni hman dan' chungchang, Tuichangral South Presbytery atanga lut chu tun aia urhsun leh nasa zawka hman tha tih a ni a, SEC bawh zui tura dah a ni.
ROREL 22-NA : Tuivai Presbytery atanga lut, 'Inkhawm ngaih pawimawh inzirtir' rawtna chu hmalak a tha a, SEC bawh zui tura tih a ni.
ROREL 23-NA : Kolasib Presbytery atanga lut, 'Pathian thu chhiar nana Bible hman tam inzirtir' rawtna chu a tha a, Kohhran tinah hriattirna chhuah ni se, tih a ni.
ROREL 24-NA : 'Mobile phone hman dan' chungchang, Aizawl East Presbytery atanga lut chu Social Front-in hmalakna a kalpui lai mek a ni e, tia inhrilh fiah a ni.
ROREL 25-NA : Tlawng leh Aizawl Hmar Chhak Presbytery atanga lut, 'Kutbûl lui chhuah panna kawng leh hmunhma siam that' chungchang chu hma lak mekna a nih thu sawi fiah a ni.
ROREL 26-NA : 'Zu leh ruihtheihthila harsatna tâwkte chhanchhuak tura nasa zawka hmalak' rawtna Aizawl Central Presbytery atanga lut chu hmalak mek dante sawiin inhrilh fiah a ni.
ROREL 27-NA : Aizawl East Presbytery atanga lut, 'LTE leh Lay Leaders’ Training subject en that' chungchang chu hmalak mekna a nih thu sawi fiah a ni.
ROREL 28-NA : 'Confidential report leh medical fitness tun aia fimkhur zawka kalpui' rawtna Champhai North Presbytery atanga lut chu he mi kawngah hian fimkhur taka kalpui zel tura infuih thar leh a ni.
ROREL 29-NA : Aizawl Presbytery thu, 'Mizoram tlawh pawhna kawng inhawng zau zel chungchanga inzirtirna neih' rawtna chu hmalak mekna a ni a, zir chianna te pawh neih a ni tawh a. Hei hi chak zawka um zui ni se, tih a ni.
ROREL 30-NA : Aizawl East Presbytery atanga lut, 'Synod Hospital tan tui tam zawk neih theih dan' chungchang chu a tha a, tihhlawhtlin dan tur SEC-in lo zawng rawh se, tih a ni.
ROREL 31-NA : 'SMTC tihchangtlun' rawtna, Sakawrhmuituai, Tuichangral North leh Chhim Tuipui Presbytery atanga lut chu a tha a, SEC bawh zui tura dah a ni.
ROREL 32-NA : Aizawl Bethel Presbytery atanga lut, 'Synod Research & Evaluation Wing kal hmang tihdanglam' rawtna chu hman nghal theih turin SEC-in lo ruahman rawh se, tih a ni.
ROREL 33-NA : Zoram Pawn Presbytery atanga lut, 'Zirlaite tan Delhi-a Hostel siam' rawtna chu a remchang lo e, tih a ni.
ROREL 34-NA : Aizawl Chhimthlang Presbytery atanga lut, 'Synod Music School tihlen' rawtna chu Synod-in a lo rel tawhte hre rengin SEC-in tihlen dan ngaihtuah rawh se, tih a ni.
ROREL 35-NA : 'Aizawl pawn atanga Synod hnuaia trainer leh campaigner ruat ve' rawtna, Champhai North Presbytery atanga lut chu a theih chin chinah tihhlawhtlin tum ni se, tih a ni.
ROREL 36-NA : 'Chhim Bial chhunga Kohhran din nghehna sum tam zawk dah' rawtna, Khawthlang Tuipui Presbytery atanga lut chu 2026-2027 budget-ah tihpun a nih thua inhrilhfiah a ni.
ROREL 37-NA : 'Kohhran Pavalai Pawl fellowship puitlinga hlan kai' rawtna, Aizawl East Presbytery atanga lut chu tha tih a ni a. A dinhmun tur leh kalphung tur SEC-in ruahman se, Synod-ah thlen leh rawh se, tih a ni.
ROREL 38-NA : 'Missionary lakah MTC atanga B.Miss zir chhuak duhsak' chungchang Aizawl Chhim Thlang Presbytery atanga lut chu kal dan pangngai hi a tha e, tih a ni.
ROREL 39-NA : Aizawl Chhim Presbytery atanga lut, 'Synod Conference Centre sak that' rawtna chu SEC thu anga renovate tura hma lak mekna a nih thu ngaihthlak a ni a. Hei hi a tawk e, tih a ni.
ROREL 40-NA : 'Khawvel ram danga kan mi leh sa (Presbyterian Kohhran) awmte ngaihsak dan kawng zawn' (SEC 314:32) leh Hmar Thlang leh Bethel Presbytery atanga lut, 'India ram pawna Mizote enkawltu dah' chungchang chu sawi kawpin, 'India ram pawna Mizo awmte ngaihsak dan kawng zawn' chu tha tih a ni a. SEC-in Synod-a ngaihtuah leh turin ruahmanna rawn siam rawh se, tih a ni.
ROREL 41-NA : Indiana Mizo Presbyterian Church, USA enkawltu tur Pastor chungchang (SEC 314:33) chu a tha a, SEC-in fimkhur takin lo kalpui rawh se, tih a ni.
Dar 4:25-ah rorel zawh a ni a, Rev. Vanlalmuanpuia Khiangte'n malsawmna sawiin rorel ni thumna a tin.
SYNOD INKHAWMPUI 2025 | ROREL NI 4-NA
December 13, 2025 (Inrinni) | Synod Information & Publicity
December 13, 2025, chawhma dar 9:30-ah Rev. John Raldosanga, Moderator-in Pathian thu Thufingte 25:11-12 a chhiar a, Upa R. Lalmalsawma, Mission Veng a tawngtai.
ROREL 42-NA : 'Kohhran Upa mahnia intihlum Presbytery Inkhawmpuia sûn' chungchang (SEC 314:37) chu a tha e, tih a ni.
ROREL 43-NA : 'Central India Presbytery hawn' chungchang (2024 Synod III:14(2); SEC 312:20; SEC 313:52; SEC 314:40; SEC 314:314:40) chu a tul rih lo e, tih a ni.
ROREL 44-NA : 'Jordan Centre, Sethawn lak' chungchang (SEC 314:41) chu tha tih a ni a, thil tulte chu SEC bawh zui atana tih a ni.
ROREL 45-NA : 'Sawrkarin a pawm theih tura Kohhranin Form kan neih tihdanglam' chungchang (SEC 315:9) chu a tul anga SEC bawh zui tura tih a ni.
ROREL 46-NA : 'Pension Dan 2024 en that' rawtna (SEC 315:22) chu rem tih a ni a, hman nghal turin SEC-in lo bawh zui rawh se, tih a ni.
ROREL 47-NA : 'Masihi Sangati Kendra (MSK) thawktu fate Medical Reimbursement (MR)' chungchang (SEC 315:39) chu January 2026 atanga hman tan tura pawm a ni.
ROREL 48-NA : 'Synod Hospital-a lung lam enkawlna changtlung zawk a awm theih nana hmalak rawtna leh zirchianna' (SEC 315:53) leh Tuichang Presbytery atanga lut, 'Cath Lab neih dan kawng zawn' chu sawi kawpin, a tha tih a ni a. SEC bawh zui tura tih a ni.
ROREL 49-NA : 'Synod Partnership Committee Inkaihhruaina dan en that' dilna (SEC 315:56) chu SEC bawh zui tura pawm a ni.
ROREL 50-NA : 'Synod Hospital dinhmun en thatna' (2022 Synod Gen. 19; SEC 301:12; SEC 308:121; SEC 312:61; SEC 315:67) chu tha tih a ni a, Hospital Board-in hma lo la chhunzawm se, tih a ni.
ROREL 51-NA : 'Ramthar Commission din' rawtna (RTB 187:5) leh Hmar Thlang Presbytery atanga lut, 'Ramthar Commission leh rawngbawlna hmathlir siam thar' rawtna chu sawi kawpin, a tha e, tih a ni.
ROREL 52-NA : 'MCC-a D.El.Ed leh B.Ed zirna hawn' rawtna (RTB 187:12) chu SEC-in a tul anga hma a lak tura tih a ni.
ROREL 53-NA : 'Synod sum vawn dan 2020 en that' rawtna (SFC 156:7) chu pawmin, Synod-a thlirho leh turin SEC-in hma lo la se, tih a ni.
Finance report ngaihthlak a ni a, 2026-2027 Synod Budget ruahmanna chu pawm a ni bawk.
2024 - 2025 Statistics tlangpui chu heti ang hi a ni :
Presbytery - 48 (Punna - 1)
Pastor Bial zat - 310 (Punna - 6)
Kohhran zat - 1,185 (Punna - 16)
Kohhran member zat - 6,46,891 (Mipa - 3,12,153; Hmeichhia - 3,34,738) (Punna - 7,602)
Secretary report leh Department report ngaihthlak niin, pawm a ni.
Chawhnu dar 4:38-ah inkhawmpui rorel zawh fel a ni a. Minute chhiarin, pawm a nih hnuah hming ziah a ni. Dar 5:00-ah Rev.C. Lalsangliana'n malsawmna sawiin Synod Inkhawmpui vawi 102-na rorel a tin.
Synod Inkhawmpui 2025-ah hian rorel palai mi 2109 an kal a. Palai thlan mi 1264 leh palai ni sa mi 845 an ni.
December 14, 2025 (Pathianni) chawhma chu Pastor nemngheh leh Pro. Pastor ruat inkhawm a ni ang a. Chawhnu chu Lalpa Zanriah Sakramen inkhawm niin, zan Inkhawmah Moderator valedictory sermon ngaihthlak a ni bawk ang.
Synod Inkhawmpui vawi 103-na chu Chanmari Pastor Bialin Chanmari Kohhran Biak Inah an thleng dawn a ni.
For more Pics Click Here