OBITUARY : REV. S.R. LALKAILUAIA
December 31, 2025 | OBITUARY
Rev. S.R. Lalkailuaia (kum 84), pensioner chu December 30, 2025 tlai dar 6:35 khan a boral a, vawiin (Dec 31, 2025) chawhnu dar 1:00 khan Dawrpui Vengthar West Kohhran Biak Inah Rev. John Raldosanga, Synod Moderator-in a vui.
Pian leh mûrna
Rev. S.R. Lalkailuaia hi Tualchêng khuaah January 21, 1941 khân a piang a. Upa Chalchhûnga leh Pi Thangseii te fa parukna a ni. May 16, 1967-ah an khaw nula Kâwlthikûngi nên an innei a. Fa pasarih (Mipa pahnih leh Hmeichhia panga) an nei a, tu 12 leh tuchhuan 2 an nei.
Zirna lam
Kum 1946-ah Lungphunlian bâwkah sikul lût tanin, Tualchêng khuaah pâwl nga thleng a zir a, an khuaah sikul a awm tâk loh avângin hlo thlovin kum li chhung zirna a chawlhsan a. Aiduzâwl M.E. Schoolah pâwl ruk a zo va, Saitual High School-ah Matric a pass a ni. Zir chhunzawm
zêl lovin a hnathawh châk ber leh a zir chhan ber Middle English School zirtîrtu hna a thawk zui ta a. Mahse, Mizoram buai 1966-ah khân sikul khâr a ni a, a thawk chhunzawm ta lo. Pathian thu zir duhna neiin Aizawl Theological College-ah written test leh interview tiin a tling a, 1968 June thlaah chuan ATC-ah L.Th. a zir tan ta a; 1971 April thlaah a zir zo a ni. Pastor-a Keitum Bial-a a awm chhungin(1976 – 1985) B.Th. a pass ve leh bawk.
Rawngbawlna lam
Rawngbawlnaah a inhmang hma hle a. Kum 14 chauh a la nih laiin Intermediate Department-ah Secretary-ah hman nghal a ni a. Rawngbawlna hrang hrang a chelh hnuah kum 1987 khan zir chhunzawm leh turin a kalsan ta a ni. Matric a pass hnua an khuaa zirtîrtu hna a thawh chhûngin KTP Branch Secretary, Zaipâwl Conductor, Senior Department zirtîrtu leh Kohhran thuhriltu nihna te a chelh zui leh a ni. Pathian biak inkhâwmah khuangpu tha ber zinga mi a ni bawk.
Pastor nih hi a thil tum a ni ngai lo va, Kohhran Upa erawh chu la nih ve a inring thîn. 1967 May thla tâwp lamah khân zînga a tui chawi hâwng, kawnga a kal laiin ‘Pathian thu hi zir ve ila a tha ang a,’ tih a rilruah a lo lût tlat mai a; hei hi Pathianin a kohna chu niin a hria. Chumi tûka an chaw ei lai chuan a chhûngte zîngah a sawi chhuak a, an remtih zâwng tak a lo ni a, Pathian kohna ni ngeia ngaiin Pathian thu zir chu a tum ta a ni. A dam chhûnga zirtîrtu nih tum kha, rambuai vânga sikul an khâr tâkah chuan rambuai hmangin Pathianin Pastor ni tûrin a ko nia inhria in Pastor ni turin a zir ta a ni.
Pathian thu a zir zawh hnuin kum 1971 Synod Inkhâwmpui chuan Pro. Pastor atân a la a, Thingsûlthliah Pastor Bial, Thingsûlthliahah dah a ni a. January 13, 1972-ah Pro. Pastor hna chu a zawm a, Pastor Lalchâma hnung a zui thîn. December 7, 1975-ah Dâwrpui Kohhran Biak Inah Pastor atân nemngheh a ni a. Keitum Pastor Bial hawn thar vawng tûra tih a ni a. January 3, 1976-ah Pastor hna chu Keitum khuaah a zawm a. Pastor Quarters a la awm lo va, kohhranin an sak chawp, thlawhbâwk inah kum li dâwn lai an khawsa a ni.
Bial a lo vawn tawhte
1) Keitum Bial - 1976-1985
2) South Hlimen Bial - 1986-1992 (tuna Hlimen Bial ni ta)
3) Dawrpui Vengthar Bial - 1993-2000
Kum 2001-ah Synod Moderator a ni a. Kum 2002 January thlaah a pension a, Dawrpui Vengthara an inah an cheng zui ta a ni. Pastor hna a thawh chhung hian nupa tuak 442 a inneihtir a, mi 3,191 a baptis bawk.
Rawngbâwlna chanvo a chelh pawimawh zualte Mizoram Synod ban pui pawihmawhte zînga mi a ni a. Rawngbâwlna chanvo pawimawh tak tak a chelh thîn. A chanvo chelh pawimawh zualte chu:
1. Synod-ah
(1) Synod Education Committee - 1974-1976
(2) Synod Ramthar Board - 1977-1979, 1992-2000
(3) Synod Pastoral Committee - 1980-1985
(4) Synod Executive Committee -1983-1985, 2000-2002, 2004-2006
(5) Synod Secretary - 1990-1991
(6) SL & PB - 1992-1994
(7) Social Front Sub-Committee - 1992-1994
(8) Pastor Nemngheh Thuchah Sawitu - 1993
(9) Synod Moderator - 2001
(10) Synod Hospital Board - 2003-2006
(11) SMTC Managing Committee - 2004-2006
(12) Synod Property Committee - 2004-2006
(13) Synod Finance Committee - 2007- 2012
(14) Synod Finance Managing Committee - 2007-2012
Synod Moderator a nih chhûng hian kohhran 142 a tlawh a, kohhran a tlawh zîngah hian Moderator la tlawh ngai miah loh kohhran 36 a awm. Mizoram chhûngah vawi 31 leh Mizoram pâwnah vawi 11 a zin chhuak a, zin nân tha 186 a sêng a ni. Committee vawi 203 a kaihruai bawk. Bial a vawn
chhung hian Bial Chairman-ah vawi 11 a tang tawh a, Presbytery Moderator vawi 5 a ni tawh a ni.
Kum 2006 kuma Presbytery 12 lai hawn thar tâk ruahmantute zîngah khân a tel ve a, July 29, 2006 khan Lunglei Presbytery a hawng a. Synod Revival Speaker Retreat-ah a thuziah vawi khat an zir ho va, Synod Lay Leaders Training-ah kum khat chhûng a zirtîr a, Synod Family Guidance and Counselling Centre-ah kum chanve chhûng counsellor hna a thawk bawk.
Thu ziah lam
Lehkhabu ziah lamah pawh a theih ang angin a inhmang a, lehkhabu a ziah tawhte chu:-
1. Thingtlâng Nula Kha (1988)
2. I Nu Thu Min Chah Kha (1991)
3. Kohhran Upa Nupui (1995)
4. Ka Lâwm Zêl Ang (2012)
A lehkhabu ziah pakhat Rorêlna Dik leh Fel: Pathian Ze Pui tih erawh chu chhuah lohvin a awm ta rih a ni.
A mizia leh a tuina lam
Kohhran inrêlbâwlna (administration) lam hi a tuipui zâwng tak a ni a. Synod inkaihhruaina hrang hrangte a hriain, inkhâwmpui thu tihtlûk rêng rêng chu zawm hram duh mi a ni. Kohhranin ziak loh dân kan neihte pawh a zir peih a, chhawm nun zel duh mi a ni. Pathian biak inkhâwm hruai a duh tui êm êm bawk.
Hmangaihtu Pathian hmangaih lêt ve hi pawimawh a ti hle a. A malsâwmna dawnga hlim êm êm a, hmangaih lêt ve si lo nia lang an awm thîn hi pawi a ti a. Pathian hi hmangaih tak zetin, bahra khur laihpui huam khawpin hmangaih ni ila, kan sualsanin kan bosan fo lo vang a ti.
Rev. S.R. Lalkailuaia hi a kut a themthiam hle. Thiamhnâng deh a thiam a, in chhung bungraw siam pawh a thiam hle a. Pastor a nih tirh pawhin inchhung bungrua te, la dehna leh thembu te thlengin a siam vek a. Puan thui a thiam hle bawk.
A hun hnuhnung lam
Rev. S.R. Lalkailuaia hi a pension hnu atangin natna hrang hrangin a tlakbuak ve ta fo a. Kum 2009 khan chuap TB avangin enkawl a ni a. 2014 khan a gland a TB a ni tih hmuh a ni leh a. A dam fel chauh tihin, rilpui cancer a ni tih an hmu chhuak leh a, enkawl a nih hnuah a dam leh ta a. August 2024 thlaah thaw hah avangin Synod Hospital-ah admit a ni a, cancer rinhlelh a ni a. September 2024 khan RN Tagore Hospital, Kolkata panpui a ni a, hetah hian cancer chi khat Plasma Myeloma a ni tih hmuhchhuah a ni a. Aizawl lama enkawl a duh avangin an hawpui leh ta a ni. A cancer hian zawi zawiin a taksa lamah harsatna a thlen chho va, a khaw hmuh te a fiah lo zel a. October 19, 2025 (Pathianni) zinga a tho chu thaw hah avangin buaipui ngaiin a awm a, Synod Hospital panpui nghal a ni a. Synod Hospital-ah hian ICU a lo ruah loh avangin Trinity Hospital-ah kalpui a ni a, ziaawm lam a pan zel a, cabin-ah te sawnchhuah a ni a.That lam pan zel tura ngaih a nih laiin, October 31 khan thisen var tlakchham avangin thisen var unit 2 pek a ni a. November thla chhung khan thisen var hi tum thum dang pek leh a ni a. Hma a sawn hret hret a, November 8-ah damdawiin atangin a chhuak thei ta a ni.
November 16, 2025 (Pathianni) zingah stroke avangin Trinity Hospital-ah admit leh a ni a, vanneihthlak takin a tha chhuak leh hlauh a. Mahse hemi hnu atang hian a chaw ei a tui thei ta meuh lova, chak loh lam a pan chho zel a. December 20 (Inrinni) atangin a tho kang peih ta lo a. December 25 (Zirtawpni) khan Synod Hospital-ah admit a ni a. Hniam lam a pan zel avangin December 29, (thawhtanni) tlai lamah ICU-ah dah luh a ni a, a tuk zing dar 8:15 velah ventilator hman a ni a. Doctor leh Nurse ten theihtawp chhuah a an enkawl chungin December 30, 2025 (Thawhlehni) tlai dar 6:35 khan chatuan ram panin a kal ta a ni.
VUINA PROGRAMME
A hmun : Dawrpui Vengthar West Kohhran Biak In
A hun : 31.12.2025. Chawhnu Dar 1:00 P.M.
Vuitu : Rev. John Raldosanga, Moderator
Chanchin sawi : Rev. B. Zohmangaiha, Synod Secretary
Thlamuanna thuchah : Rev. John Raldosanga, Moderator
Zaipawl : Dawrpui Vengthar West Kohhran Zaipawl
Tawngtaisaktu: Rev. Dr. K. Lallawmzuala, Executive Secretary
Hla sak ho : ‘Hmangaih zual che ka duh’ KHB No. 428
Malsawmna : Rev. Lalsangmuana, Statistician
Thlanmual Hun hmangtu : Rev. D. Zobiaka, Bialtu Pastor, Dawrpui Vengthar
