Mizoram Synod, Family Guidance & Counselling Centre (FG&CC)-in Kohhran hruaitute puala August 5, 2015 atanga Synod Conference Centre-a Church Leaders Intensive Residential Pastoral Care & Counselling Training vawi 23-na a buatsaih chu nizan (August 18, 2015) khan ‘Final Evaluation & Graduation Service’ neiin khar a ni.
Training kharna hun hi Rev. Lalrinmawia, Synod Moderator chuan a hmanpui a, training chhuakte hnenah Certificate semin thuchah a sawi. He Counselling Training-ah hian Pastor Bial 8 atangin Kohhran aiawh 28 an tel a ni. Training kharna inkhawm hi Rev. R. Lalhmingthanga, Director, FG&CC-in a kaihruai a, Training chhuakte chuan training an hlawkpui dan a lema an ziak chu entirin an hrilhfiah a, Upa RK Lalthanlianan training te aiawha thu sawiin, Kulikawn Pastor Bial Zaipawl an zai bawk. He hun hmanpuitu, Synod Moderator Rev. Lalrinmawia chuan training chhuakte fuihna thu sawiin, "Kohhran mite hi harsatna tawk lo leh Counselling mamawh lo tak tak an awm lova, eng lai pawha chawm leh enkawl ngai reng an ni. Chuvangin inthlahdah lova, chawl lova kan thawh reng a ngai a ni" a ti a. Chumi atana Counselling Training buatsaih a ni thin chu lawmawm a tih thu sawiin, Training chhuakte chu thahnemngai taka rawngbawlna chhunzawm zel turin a fuih.
FG&CC hian Pastor-te pualin Pastoral Care & Counselling Training hi vawi 24 buatsaih tawhin, Pastor 407 training a neihpui tawh a. Church Leader-te puala kum 2002 atanga training a neihpui tawhah, tun tuma mite nen hian Kohhran hruaitu 455 Training pek an ni tawh bawk a ni. Tin, Synod hian Counselling Centre paruk - Mission Veng, Chanmari, Vaivakawn leh Champhai Vengthlang, Kolasib leh Serchhipah te a nei a. Heng Counselling Centre parukah hian tun thlenga pantu (Clienct) an neih tawh zat chu mi 13,131 an ni a, kumin 2015 bikah pantu 1,996 an nei tawh bawk.