Nizan (Feb. 2, 2026) khan Synod Social Front leh Mizoram Architects Forum (MAF) tangkawpin an buatsaih Residential Construction Supervisor Training hlanna hun hman a ni.
Training hi Synod Multipurpose Training Centre (SMTC), Mission Vengthlangaah neih a ni a, February 27, 2026 thleng a awh ang.
Training hlanna hun hi Upa C. Lalduhawma, Synod Secretary (Jr.)-in a kaihruai a, Pu Lalchhungliana, Social Front Coordinator-in thupuan leh inhmelhriattirna hun a hmang a, Pu Frederick Malzawmzuala, President, MAF-in Training chungchang sawi hawnna a nei a, Rev. Dr. K. Lallawmzuala, Executive Secretary i/c Social Front-in thuchah sawiin training hi a Pathian hnenah a hlan a ni. Rev. Dr. K. Lallawmzuala chuan construction supervisor hna pawimawhzia leh hlutna te a sawi a. Ei zawnna piah lamah ram leh hnam humhalhna atan pawha tangkai tak tur a nih thu te sawiin thahnemngai tak leh hlawhtling ngei tura training turin a fuih a ni.
Synod Social Front hian eizawnna mumal neiloten eizawnna an neih theih nan kut themthiamna training chi hrang hrang Aluminium Mistiri Training te, Plumbing Training leh Cement Mistiri Training te a lo buatsaih tawh thin a ni. Construction Supervisor Training hi a tum khatna a ni a, tun tumah hian trainee, mi 16 an awm a ni.
For more Pics Click Here