Vawiin (Feb. 4, 2026) chawhma dar 10 khan Synod Ramthar Board meeting vawi 188-na chu J.M Lloyd Hall, Synod Office-ah an thu.
Meeting hi Synod Moderator, Rev. John Raldosanga’n a kaihruai a, hming lamna neih a nih hnuah Rev. R. Lalhmingsanga, Board Secretary-in report a pe a, report-ah hian November 21-23, 2025 chhunga Chakma Convention neih a nih thu te, Missionary Health Care Worker Training Batch 6-na neih a nih thu te, MDTC Graduation neih a nih thu te, Aizawlah Chakma Christian Fellowhip hawn thar a nih thu te leh kum 2025 chhunga Mission Field hrang hranga belhtu thar 7229 an awm thu te tarlan a ni.
Tun tumah hian thurel tura chhawpchhuah 14 a awm a, chung zingah chuan Field Master Plan en that chungchang te, SMB School-a Smart Class kalpui chungchang te, Falkawna Ram lei chungchang te, Presbyterian Church of Korea leh SMB thawh dun chungchang te, Etawah Bialtu Pastor thuthmun chungchang te chu a langsar zualte an ni.
For more Pics Click Here