Rev. Lal Rinmawia (kum 88), pensioner chu February 9, 2026 tlai dar 4:18 khan Pneumonia avangin a boral a, vawiin (Feb. 10, 2026) chawhnu dar 1:00 hian Khatla Kohhran Biak Inah Synod Moderator Rev. John Raldosanga’n a vui ang.
">
A Chanchin
Rev. Lal Rinmawia hi August 29, 1938 khan N. Bukpui khuaah a piang a. A pa chu RT Khuma niin, a nu chu B. Zaithangi a ni. A nu hi N. Bukpui khuaah Middle School zirtirtu a ni thin a, heta an awm lai hian a piang a ni. October 23, 1963 khan K. Zopari nen an innei a, fa - mipa pathum leh hmeichhia pakhat an nei.
Zirna lam
Rev. Lal Rinmawia hian Primary School hi Mission Primary School, tuna Sikulsen, Mission Vengah kum 1948 khan a zo va, kum 1951 khan Sikulpui atangin Middle English a zo leh a, Primary leh Middle School-a a zirlai hian lehkha a thiam avangin Scholarship a hmu pha a ni. Mizo High School atangin kum 1956 khan Matric a pass a. Matric a pass hnu hian PWD hnuaiah LDA-in a thawk nghal a. Sorkar hna thawk chung hian Shillong-a St. Edmund's College-ah Evening Class zawmin, heta tang hian I.A. leh B.A. a zir zo leh a. Chumi hnuah Sorkar hna bansanin, Synod hnuaiah a lut a, Leonard Theological College, Jabalpur-ah Bachelor of Religious Education (BRE) a zir leh a, hemi kum vek hian Jabalpur-ah hian Evening Class kal chungin M.A. (Pol. Sc.) a zir zo bawk. BRE a zir zawh hian Serampore College-ah external-in BD a zir a, tha takin a pass leh bawk a ni.
Rawngbawlnaa a luh dan
Rev. Lal Rinmawia pa RT Khuma hi Synod Press-a thawk thin niin, Mission Vengah missionary bul hnaia awm an ni a. Hetiang a nih avangin Rev. Lal Rinmawia pawh hian a naupan têt atangin kohhran a bêl chawt a. A lo tlangval hnu pawhin KTP hruaitu niin, zaipawlah te pawh a tangkai hle.
Matric a pass hnu hian an chhungkaw dinhmun avangin lehkha a zir chhunzawm mai thei lova. Sorkar hna a dil a, kum 1956 atang khan PWD hnuaiah LDA hna a thawk a. Shillong-a Accountant General Office-ah Account training a zawh hnuin Assistant Divisional Accountant hna a thawk a. Kum 1963 atang khan Development & Panchayat Department-ah Internal Auditor hna a thawk a. Kum 1968 atang khan sorkar hna thawk chungin Central KTP General Secretary hna a chelh a. Hetiang a nih avang hian a rawngbawlna leh a hnathawh inbukthuah chang a awm ta fo va. KTP General Conference hun lai takin sorkar hnaa a duty tulnate a awm ta a. Ngaih pawimawh zâwk tûr hriat harsa tiin, a hun kal zêl atân a khawi zâwk emaw hi thlan fel a tul niin a hre ta a ni.
Central KTP hian Synod-ah full time Secretary neih an dil thin a, a hlawhtling mai thei lo va. An dil nawn fo hnu chuan Synod chuan KTP full time Secretary atana training-a tirh tur mi zawn an rel a. Hei hi a tana rawngbawlna kawng inhawn tanna nia ngaiin a hna bansan huamin a dil ve ta a. Vanneihthlak takin lak a ni ta a ni. Leonard Theological College-ah BRE a zir a. Kum 1973 khan BRE hi zir zovin, Central KTP General Secretary-ah hun puma thawk hmasa ber ni turin a zawm ta a ni. Hetih hunlai hian Coordinator hi Synod Worker tih an ni thin a, CKTP-a awm chu Youth Worker tia sawi an ni thin.
Pastoral Ministry-a a rawngbawlna
Kum 1978 khan Pro. Pastor atan lak a ni a, Venghlui Bialah dah a ni a, kum 1980 khan Synod Inkhawmpui, Dawrpuia neihah nemngheh a ni.
Rawngbawl hna a thawh chhung hian Mizoram pawnah a awm tam hle a, a hun tam zawk a hmang a. Kawng hrang hrangah a sulsutu pawimawh tak a ni thin a ni. Mizo Pastor zinga National Council of Churches in India (NCCI) a Secretary ni tura tirh hmasak ber a ni a. NCCI-a a thawh laia Nagpur-a an awm lai hian India rama Sunday School movement siam that tumin a bei nasa viau a, All India Sunday School Association pawh hi an din a ni a, a hming pawh hi a phuah a ni nghe nghe.
India ram luh chilh tura Calcutta Mission Field Secretary atana Synod Mission Board-in a tirh hmasak ber a ni a. Presbyterian Youth Fellowship (PYF) Secretary hmasa ber a ni bawk a, term hnih a chelh a ni.
Rawng a bawl chhunga a hna chelh hrang hrangte:-
1. Synod Youth Worker - 1973-1980
2. Senior Secretary, NCCI - 1981-1987
3. Synod Hospital Chaplain - 1987
4. Calcutta Mission Field Secretary - 1988-1993
5. Synod Mission Board Secretary - 1994-1996
6. Pastor, Dawrpui Pastor Bial - 1997
7. Synod Moderator - 1998
Kum 1999, January ni 1 khan Pension-in a chhuak ta a ni.
Hengte bakah hian PCI Executive Committee Member leh PCI Mission & Evangelism Committee Member a ni tawh a. Synod hnuaiah Synod Executive, Ramthar Committee, Music Committee, Sunday School Committee leh Board hrang hrangah Committee Member a lo ni tawh bawk. Tin, Kristian Hla Bu No. 230-na, 'Ngai teh Pathian ni ropui' tih hla hi a lehlin a ni a, hei bakah hian 'Phurrit a bo ta Kalvariah' tih te, 'Tawngtai theihnghilh suh' tih leh Kristian hla dang eng emaw zat a letling bawk.
A hun hnuhnung
Kum 2025 December atang khan a taksa a chak lo chho va, hma a sawn mai loh avangin Doctor te rawn an ni a, hemi hnu hian Food Supplement-te nen enkawl chhoh a ni ta a. Ni 17.1.2026 zan atang khan thil a ei hleih theih loh avangin Doctor te rawn leh an ni a, tichuan ni 18.1.2026 zanah drip khai tan a ni.
A Blood Sugar level te a san deuh avangin January 20, 2026 khan Ebenezer Hospital-ah investigation ti turin admit a ni ta a. Doctor-in ngun taka a en hnuah Pneumonia a nei tih hmuh chhuah a ni a. Antibiotic leh Steroids treatment lak nghal a ni a, Oxygen mask pawh vuah reng a tul ta a ni. February 8, 2026 (Pathianni) zanah hian oxygen pek a kham loh deuh avangin level 10-ah tihsansak a ni a, mut pawh a mu tha vak lo.
February 9, 2026 (Thawhtanni) zing lama Doctor round chuan a HB a hniam deuh avangin thisen chaw pek a ngaih thu leh ABG blood test nghal a ngaih thu a sawi bawk a. ABG blood test hi Seventh Day Hospital-ah tih a ni a. Hemi hnu hian ventilator hman a tul tur thu nurse ten an rawn sawi bawk a ni. Dar 3:00 pm vel atangin CPR tih a ngai ta a, hei bakah Incubator te hman tel a ngai bawk a. Tichuan, Doctor leh Nurse ten an theihtawp an chhuah hnuin tlai dar 4:18 pm khan a rawng a lo bawl thin Lalpa hnena chawl turin min kalsan ta a ni.
VUINA PROGRAMME
A hmun : Khatla Kohhran Biak In
A hun : 10.2.2026 (Thawhlehni) Chawhnu Dar 1:00
Vuitu : Rev. John Raldosanga, Moderator
Chanchin sawi : Rev. B. Zohmangaiha, Synod Secretary (Sr.)
Thlamuanna thuchah : Rev. John Raldosanga, Moderator
Zaipawl : Khatla Kohhran Zaipawl
Tawngtaisakna : Upa C. Lalduhawma, Synod Secretary (Jr.)
Hla sak ho : ‘Pathian thil rel dan chu’ (KHB No. 22)
Malsawmna : Rev. Dr. Rosiamliana Tochhawng, Executive Secretary
Thlanmual : Rev. C. Sapkaia, Bialtu Pastor