Kristian Thalai Pawl
Bial KTP Conference laia KTP member vanduaina tawkte hnenah Central KTP chuan hetiang hian damlo kanna leh ralna hun a hmang:
1. Pu Ruatsanga, Mualthuam Branch, Thaidawr Bial chu January 30, 2026 (Zirtawpni) khan Pu Lalruatfela, Asst. Leader leh Tv. Lalrinsanga Varte, Committee Member ten an chenna inah an ral.
2. Pu Lalnunzira, Luangpawn, Phullen Vengthar Bial leh Tv. Lalrinsiama, Lamzawl Branch, Ngopa Bial te chu January 30, 2026 (Zirtawpni) khan OB ten Synod Hospital, Durtlangah an kan.
3. Pu Ricky Lalthansanga leh Pu Lallawmsanga, Luangpawn Branch, Phullen Vengthar Bial te chu February 3, 2026 (Thawhlehni) khan Pu C. Lalkhawngaiha, Asst. Secretary, T.Upa Rinsailova Sailo, Treasurer leh committee member te, T.Upa Lalremsiama Khiangte leh Upa Lalbiakfela ten an chenna inah an ral.
Damlo kanna leh mitthi ralna sum te hi Chhawmdawlna pual tumkhat KTP inkhawm thawhlawm lak khawm atanga pek a ni.
Synod Prison Ministry
February 13-14, 2026 chhung khan Mamit District Jail-ah Prison Ministry-in hun an hmang a, he hunah hian Rev. Lalhleia, Prison Ministry Director bakah counselor mi 11-in hun an hmang. Synod Prison Ministry hian District hrang hrang Jail-ah te hun an hmang thin a, kohhran ni pawimawhah inkhawm te neihpuiin a tul dan angin counseling class te pawh an neihpui thin a ni.
Synfo
February 12, 2026 (Ningani) khan February 26 - March 1, 2026 chhunga KTP General Conference neih tura video cover dan tur leh Live telecast dan tur en felin Synod Information & Publicity (Synfo) atangin Production Team member 4 te Saitualah an kal a. Production Control Room tur te, camera khai dan tur te, internet connection chungchang leh thil tul dangte an buaipui a ni.
Mizoram Synod hnuaia inkhawmpui lian leh tê zawng zawng hi Synod Information & Publicity (Synfo) chuan Live-in a pe chhuak thin a. Tun tum KTP General Conference pawh hi Live-a pe chhuak turin a inbuatsaih mek a, Mizoram Synod-in media a neih pahnih - Hruaina Eng leh Synod Information YouTube-ah Live tura ruahman a ni.
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
Bunghmun North-a damlo mi pahnih hnenah Rs.10,000/- ve ve, Sihphir khuaa damlo mi pahnih hnenah Rs.10,000/- ve ve, Bukpui khuaa vanduaina tawk chhungkaw pakhat hnenah Rs.10,000/-, Mauchar khuaa damlo mi pakhat hnenah Rs.10,000/-, Palsang khuaa damlo mi pakhat hnenah Rs.10,000/-, Zawngin khuaa damlo mi pakhat hnenah Rs.10,000/- leh Rajivnagar-a damlo mi pakhat hnenah Rs.10,000/- pek a ni.
January 2026 thla chhunga harsatna hrang hrang tawkte hnena Synod Relief Fund atanga chhawmdawlna sem zat chu Rs.2,20,000/- a ni.