Central YMA leh Mizoram Synod tangkawp buatsaih Chhanchhuahna Camping, Beraw Tlanga neih chu nizan (Aug. 23, 2015) khan a kharna Inkhawm hman a ni.
Chhanchhuahna Camping hi August 4, 2015 atanga tan niin ruihhlo ngaite puala siam a ni a. August 5, 2015-ah a hawnna programme hmangin Camping hi Synod Moderator Rev. Lalrinmawian a hawng a ni. Camping-a lut tur hi YMA Branch hrang hrangin an mahni Branch huam chhung atangin an thawhkhawm a, camping-a mawhphurhna hrang hranga duty turin Aizawl khawpui chhung Branch hrang hrangte a inchhawkin an duty thin a ni. Camping speaker atan Synod Revival Speaker Pu Lalsanglura Ralte, Sons of God Team hman an ni.
A tantirh ni-a campers lut zat hi 345 an ni. Hmunin duh anga a daih loh avangin verandah-ah thahnem tak an mu nghe nghe a ni. Cam programme-ah hian Pathian thu-a ti char char lovin Sports lam te nen hun hman a ni a, Campers zingah harsatna hrang hrang avanga awm tluan thei lo mi 169 chu an chhuak leh a, a tawp thlenga awm tluan chu mipa 153 leh hmeichhia 23, an vaiin 176 an ni ta a ni.
Campers te tan Mahindra Motor Agent ten T-shirt an rawn pe a, Mission Vengthlang Branch YMA in hmeichhe tan bik inkhawmna-a an bih tur puan mawi tak 23 an rawn pe bawk a ni. Camp neih chhung hian August 15, 2015 (Independence Day) khan Flag pawtparhin Health Minister hovin hun hman ve a ni a, TNT Band party in rimawiin an rawn awi a, programme hlimawm tak hman a ni. August 21, 2015-ah YMA Ni hman a ni a, hemi ni tlaiah hian Campers te awmna Branch hruaitute sawm khawmin campers te enkawl zel dan tur sawiho a ni.
August 23, 2015-ah Kohhran Ni hman a ni bawk a, zan inkhawm hi Camping kharna pualin hun hman a ni a, Rev. Lalzuithanga, Senior Executive Secretary, Mizoram Synod in Pathian thuchah ropui tak sawiin camping programme chu tihtawp a lo ni ra a, vawiin (Aug. 24, 2015) khan Camp atangin an chhuak ta a ni. August 24 - 26, 2016 chhung hian zan tinin Follow Up programme, Chanmari Kohhran Biak In-ah neih tur a ni a, August 28, 2015-ah Camp chhuakte hi Kelkangah kalpui tura ruahman a ni.
Central YMA hian SRS hmangin ruaihhlo zuar leh a ti thin te an buaipui nasa em em a, an sim theih nan nasa takin kawng an zawng a, Pathiana piantharna an neih hi an simna ber tur a ni, tih an hriatin tihdan tur kawng an zawng ta a. Mizoram Synod hotute nen inbia-in tanho dan kawng an zawng ta a. Central YMA atangin member 5 leh Synod Revival Committee atangin member 5 ruatten hma lak dan tua an ngaihtuah ta a, Organising Committee siamin hma an la ta a. Hemi atan hian Synod Revival Budget atangin Mizoram Synod chuan Rs. 8,50,000/- (Cheng Nuai riat leh Singnga) a sanctioned a ni.