Nizan (May 28, 2026) atang khan Synod Mission Board buatsaihin Central Region Missionary Retreat vawi 5-na, Luangmual Kohhran Biak Inah neih a ni a, May 31, 2026 (Pathianni) zanah a tiak ang.
Retreat-ah hian Rev. Dr. Rosiamliana Tochhawng, Executive Secretary i/c Mission etc. chu Speaker a ni a, thupuiah ‘Phuarna leh Hrehawmnain a hmuak che (Tirh 20:23)’ tih a ni.
Nizan (May 28, 2026) khan vantlang Pathian Biak Inkhawm neih a ni a. Inkhawm hi Rev. R. Lalhmingsanga, Mission Board Secretary-in a kaihruai a, Pu Albert Lalhmangaiha, SMB Coordinator-in Inhmelhriattirna leh SMB report a pe a, Synod Moderator Rev. John Raldosanga'n Keynote Address a sawi.
Vawiin (May 29, 2026) hian thupui 2 zir ho a ni a, chawhma lamah ‘Mental and Physical Health Awareness’ tih thupui hmanga Upa Dr. C. Lalhrekima, Mission Veng paper buatsaih zir ho a ni a, chawhnu lamah “Tunlai India ram dinhmun thlir chunga rawngbawl zel dan tûr’ tih thupui hmanga Rev. Dr. K. Lalchhuanawma, ATC paper zirho a ni. Zan inkhawmah retreat speaker, Rev. Dr. Rosiamliana Tochhawng-in Pathian thuchah a sawi ang. Zan inkhawm banah hian Kohhran Hall-ah Zai khawm a ni ang.
May 30, 2026 (Inrinni) hian chawhma lamah Legal Awareness with Alliance Defending Freedom hun an hmang ang a, chawhnu lamah Inhlan tharna leh Fakna Inkhawm neih a ni ang. Zan inkhawmah Speaker hnen atangin Pathian thuchah ngaihthlak a ni ang a, zan inkhawm banah Kohhran Hall-ah Zai khawm a ni ang.
May 31, 2026 (Pathianni) chawhma leh chawhnu hian Speaker, Rev. Dr. Rosiamliana Tochhawng hnen atangin Pathian thuchah ngaihthlak leh a ni ang. Chawhnu inkhawmah hian Missionary thi sunna hun hman nghal a ni ang. Zan inkhawmah Rev. R. Lalhmingsanga, Synod Mission Board Secretary-in Pathian thuchah a sawi ang a, inkhawm banah Kohhran Hall-ah Zai khawm a awm leh ang.
Retreat-ah hian Central Region-a Mission Field 8 atangin Missionary-te leh an chhungte mi 694 an kal thei a. Palai riaklut hi mi 590 awmin, langa kal mi 104 an awm a ni.
Tun dinhmunah Synod Mission Board hnuaiah hian Mission Field 21 awmin thawktu mi 2708 an awm mek a, January atanga April, 2026 chhungin ringthar 1806 an hmuh belh tawh a ni.
Central Region Missionary Retreat programme hi Hruaina Eng TV (LPS & Zonet) leh Synod Information Youtube Channel-ah te Live Telecast a pek chhuah a ni ang.