Synod Multipurpose Training Centre (SMTC) buatsaih Lay Leaders’ Training vawi 238-na chu nizan (June 22, 2026) khan hawnna inkhawm, SMTC, Mission Vengthlangah neih a ni a, training hian June 26, 2026 (Zirtawpni) thleng a awh ang.
Training hawnna inkhawm hi Rev. H. Lalmuanchhana, Director-in a kaihruai a, inlawmna leh report te ngaihthlak a nih hnuah Rev. Lalsangmuana, Synod Statistician-in training hawngin thuchah a sawi a, Rev. Lalsangmuana chuan rawngbawlna chu phur tak leh hlim taka thawk turin kal khawmte fuih a ni, he hunah hian Upa H. Zarzoliana, Falkawn a zai bawk.
Tun tum training-ah hian Presbytery 13 - Kolasib, Sakawrhmuituai, Tuichangral South, Aizawl Hmar, Aizawl Central, Dampa, Tuichang, Tuivawl, Aizawl East, Chhimchhak, Tuirini, Hmarthlang leh Aizawl Bethlel atangin Kohhran Upa 49 an tel a ni.
Kohhran Upate tana Lay Leaders’ Training hi kum 1996 atang khan neih tan a ni a, training-ah hian Kohhran Upate tan Kohhran enkawl dan leh inrelbawlna lam atana pawimawh chi hrang hrang bakah Kohhran thlarau lam nun enkawl dan te zir thin a ni.
Training hi June 26, 2026 (Zirtawpni) zan khan kharna inkhawm neih a ni a, Rev. B. Zohmangaiha, Synod Secretary-in training chhuakte hnenah Certificate hlanin thuchah a sawi a, Nl. Rohlupuii, Salem Veng tum hnih a zai bawk.
Synod Multipurpose Training Centre (SMTC) hi January 12, 1996 khan din a ni a, a tira a hming chu Christian Multipurpose Training Centre tih a ni a, kum 2001 Synod Inkhawmpui chuan Synod Multipurpose Training Centre (SMTC) tiin a thlak leh a ni. SMTC hnuaiah hian training chi hrang hrang (Vocational Training) buatsaih thin a ni bawk a, tunah hian trade chi hrang panga – Tailoring (Mipa leh Hmeichhia), Computer, Mobile repairing, Beauty Culture leh Electrical te kalpui mek a ni a, zir chhuak tawh mi 2208 awmin tunah hian zirlai 107 an awm mek a ni.
For more Pics, Click Here