Kohhran Pavalai Pawl
July 21, 2026 (Thawhlehni) kha Kohhran Pavalai Pawl Din Tan Ni a ni a, Tualchhung kohhranin an remchan dan angin a lawmna hun an hmang a ni.
Synod Inkhawmpui 2012 in Pavalai Pawl a pawm/din hma daih tawh khan mi thahnemngaite hmalakna a zarah Pavalai Pawl hi thangduang takin a lo ding tawh a. Synod Inkhawmpuiin a pawm chin atang phei kha chuan Bial leh Kohhran, a din remchanna apiangah din a ni chho ta zel a, kum tinin an pung chho zel a ni. A din tan ni chungchangah SEC 257 chuan pawm dan hmasa lo nei tawh mahse Synod Inkhawmpuiah ennawn a rawn luh leh avangin ennawn a ni a. Tichuan Synod 2020 khan tuna kan hman mek July 21, 2004 chu a pawm ta a ni.
Synod Inkhawmpui vawi 102-na Zarkawt Kohhrana neih chuan Kohhran Pavalai Pawl chu Fellowship puitlinga hlankai tha a ti a, fellowship puitlinga hlankai tura thil tul awm te Synod Executive Committee (SEC)-in bawhzuiin Synod-ah a thlen leh dawn a ni.
Kohhran Pavalai Pawl Thupui chu ‘Krista tana nun’ tih a ni a, an pawl thiltum te chu:
(1) Midangte Krista hnena hruai.
(2) Kohhran hmalakna tawiawm.
(3) Kristian chhungkaw tha din tura tan lak, tih te a ni.
Inchhiarna hnuhnung bera Pavalai Pawl dinhmun chu hetiang hi a ni:
KPP din tawh na Kohhran zat - 698
Bial KPP din tawh zat - 167
Ram pawna Tualchhung KPP din tawh zat - 5
KPP member zawng zawng - 52576, an ni.
Kristian Thalai Pawl
July 11-12, 2026 chhung khan East Lungdar Venghlun Bialah ‘Social Media hman dan inzirtirna’ hun hmangin committee member-te, Pu Rochhingpuia, T.Upa H. Lalthakima, Pu Ricky Lalthlamuana Fanai leh Pu Lalnunsiama te an kal.
July 16, 2026 (Ningani) khan Vaphai Bialah Leadership Training neihpuiin committee member-te, T.Upa K. Zoramthanga, T.Upa Lalramzauva Ralte te an kal a, Leadership Training-ah hian mi 32 an tel.
Trust
July 16-17, 2026 chhung khan Kelkang Pastor Quarters chei that leh fencing siam ngai en felin Pu Lalhriatrenga, JE a kal.
Presbyterian English School (PES)
July 16-17, 2026 chhung khan PES pali - Sailulak PES, Sesih PES, Leisenzo PES leh Lianpui PES te tlawhin Upa PC Vanlalhruaia, Supervisor of Schools a kal.
Campus Ministry
July 16-18, 2026 chhung khan Chawlhhmun North Kohhranah Tleirawl Camping neiin hun hman a ni a. He hunah hian Rev. Johny Lalremfela, Director leh Resource Person te, Pu David Lalnunsanga Colney leh Tv. Lalrinmawia ten hun an hmang a, Tv. Lalthlanawma, Praise On 2024 pakhatnain zaia rawngbawlna neiin hun a hmang bawk.
Worship
July 18, 2026 (Inrinni) khan Vaivakawn Kohhranah Worship Seminar neih a ni a, he hunah hian Resource Person-te, Rev. Dr. Rosiamliana Tochhawng, Executive Secretary i/c Worship leh Rev. F. Lalhmingthanga te an kal.
July 18, 2026 (Inrinni) khan Kelsih Branch KTP te Zai Hruai training neihpuiin Instructor-te, Tv. Samuel VL Hruaitluanga leh Pu Emmanuel Lalrinmawia te an kal a, training-ah hian mi 43 an kal a ni.
Finance
July 18-19, 2026 chhung khan N. Hlimen Bialah Finance Campaign neiin campaigner-te, Upa R. Lalbiakdika, Synod Office, Upa P.C. Vanlalrova leh Upa C. Ramtharnghaka te an kal.
Social Front
July 18-19, 2026 chhung khan Ngopa Kohhranah Zuk leh Hmuam Do beihpui Awareness Campaign neiin campaigner-te, Upa C. Chawngthantluanga leh Upa Dr. Thanchungnunga te an kal.
MSSU
July 18, 2026 (Inrinni) khan Armed Veng South Kohhranah Sunday School Zirtirtu training neihpuiin trainer-te, Upa K. Vanlalnghaka, Upa Zohmangaih leh Upa Lalbiakliana te an kal.
Chhim Bial
Synod Office, Lunglei atangin tun hnaia chhim lama khuarel chhiatna hmun hrang hranga thlengah Synod Relief Fund hetiang hian pek chhuah a ni a.
Tlabung Chawnpui lamah lei minin chenna In a hnawl sak chhungkaw hnih te, Chawnpui Bethel lamah chhungkaw 5 leimin avanga luah ngam tawh lo chenna in te hnenah pek an ni a. Lunglei atanga Lawngtlai lam panna kawng Tawipui South leimin avanga kaltlang thei lo Motor tangte lo buaipuitu Tawipui Joint YMA te hnenah a tul anga an hman turin pawisa fai pek a ni bawk. Pawisa hi a vaiin Rs. 1,41,000 pek chhuah a ni a, Rev. H. Lalhmingmawia, Administrative Secretary Chhim Bial leh Pu K. Lalchhanhima, Area Promoter-ten a hmunah kal chilhin pawisa hi an hlan a ni.
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
South Sabuala damlo mi pahnih hnenah Rs.20,000/-, New Verveka damlo mi pahnih hnenah Rs.20,000/-, Marpara North-a tui lian tuar chhungkaw pakhat hnenah Rs.15,000/-, Tanhrila khawsak harsa chhungkaw pakhat hnenah Rs.10,000/-, Tanhril Vengthara khawsak harsa chhungkaw pakhat hnenah Rs.10,000/-, Darlawn khuaa damlo mi pakhat hnenah Rs.10,000/-, Vairengte Chhimvenga vanduaina tawk chhungkaw pakhat hnenah Rs.10,000/-, Rengdil Dinthara damlo mi pakhat hnenah Rs.10,000/-, Thingsai khuaa damlo mi pakhat hnenah Rs.10,000/-, Zohmun Kawnzara damlo mi pakhat hnenah Rs.10,000/- leh Ramrikawna khawsak harsa chhungkaw pakhat hnenah Rs.10,000/- pek a ni.