Rev. J. Vanlalhnuna (kum 69), pensioner chu nizan (July 23, 2026) dar 8:50 khan Heart Attack avangin a boral a, vawiin (July 24, 2026) chawhnu dar 1:00 hian Bawngkawn Kohhran Biak Inah Synod Moderator Rev. John Raldosanga’n a vui ang.
">
Pian leh mûrna leh school kalna:
Rev.
J. Vanlalhnuna hi Lianphaia (L) leh Thangkûngi (L) te fa palina niin
February 2,1957 khan Vanzau Mêl Vêngah a lo piang a, an unau hi mipa
pali leh hmeichhe pathum an ni a. May 17, 1957-ah Pastor Khualhnawkan
Baptisma a chantir.
Manipur-a missionary Lalparmawii nên September17,
1988 khan Lamka Presbyterian Kohhran Biak Inah a innei a. Fa pathum an
nei a, chungte chu -
1. Immanuel Lalrawngbawla H/o Lalthlanawmi
2. Esther Lalmalsawmi
3. Joseph Roluahpuia
Vanzau
khuaah seilianin Pâwl VIII thleng Vanzau-ah lehkha a zir a, Pâwl IX
& X hi Chhiahtlang High School-ah a zir chhuak a; kum 1975-ah Pâwl
IX a zir laiin, “Rinna avânga khawngaihnaa chhandam” (Ephesi 2:8) tih
thu hmanga Pathian chhandamna changin Pathian hnênah a nun a hlân ta a
ni.
Rawngbâwlnaa a luh dan:
Kum 1979-ah Vanzau Kohhran
KTP Secretary Rinmawia chu missionary-in a kal chhuak a. Heta tang hian
missionary nih ve duhna hi a thinlung chhûngah a nung reng a. Rinmawia
hi vanduaithlak takin malaria natna avângin September 1979-ah Mamit-ah
a boral ta hlauh mai a. He thihna hian missionary tûra cho chhuakin,
missionary tur chuan a chhuak ta a. Missionary thawk tur hian kum 1979
October thla khan Rev. Dr. Lalsawma (L), hetih laia Synod Home Mission
Secretary-in Mamit thlengin a motor-in a thlah a. Tichuan, October 1979
atanga June 1983 chhûng khan Khanthuam-ah missionary hna a thawk ta a
ni.
Missionary-a a thawh lai hian Pathian thu zir ch^kna neiin,
Pathianin hun remchang a siamsak a, Pathian thu zir turin a tling hlauh
mai a. Tichuan, June 1983 atangin Aizawl Theological College (Mission
Vengthlangah) B. Th. zirin kum 1987 khân tha takin a zir zo ta a ni.
Pathian
thu a zir zawh kum 1988-ah Manipur-ah missionary-in a kal leh a.
Imphal-ah Meitei tawng ziak leh chhiar thla thum chhûng a training phawt
a. Hemi hnu hian Heigrujump (Manipur) ah missionary hna lungawi takin a
thawk leh bawk.
Kum 1988 Synod-in Pro. Pastor tûra lain 1989-1991
thleng Zohmun Pastor Bialah Pro. Pastor hna thawkin a awm a. Pro.
Pastor-a a tan chhûng hian B.D. tha takin a zir zo ve leh a ni.
Pastor Bial vawn tawhna leh awm kumte:
1. Tlabung Pastor Bial: 1992-1994
2. Hnahthial Pastor Bial: 1995-1997
3. Hliappui Pastor Bial: 1998-2004
4. Aizawl Civil Hospital Chaplain: 2005-2010
5. Chaltlang Pastor Bial: 2011-2015
6. Counsellor, Family Guidance & Counselling Centre, Vaivakâwn: 2016-2019
A rawngbawl chhunga mawhphurhna a lo chelh tawhte:
1. Synod Committee telnate:
(a) Education Board 1993-94
(b) Executive Committee 2002-2002, 2011-2015
(c) Pastoral Committee 2003-2005
(d) Nomination 2001
2. Presbytery Moderator:
(a) Chhim Presbytery, Vawi 6-na, Lunglei Venglai, 1995
(b) Tuivawl Presbytery, Keifâng, 2000
(c) Aizawl Bethel Presbytery, Ramhlun ‘N’, 2012
Pastor rawngbawl hna a chelh chhung hian Baptisma mi 1875 a chantir a, nupa tuak 301 a inneihtir bawk.
Kum
1989 atanga 2019 thleng Pastor rawngbâwl hna a thawh hnuin
Superannuation pension-in a rawngbâwlna a hlen chhuak a. Pathian
khawngaihna kawng hrang hranga dawngin Aizawl Bawngkâwnah in leh lo
neiin a inbêngbêl ta a ni. Bawngkawn Kohhranin a tangkaipui hle a,
Bawngkawn Kohhran hnuaia Sub Committee hrang hrangah chairman-ah te hman
a nih bakah Kohhran aiawhin Fellowship-ah te a awm bawk. May 24, 2026,
Pentikos Ni khan thupui ‘Isua hnenah an awm tawh tih an hre ta’ tih a
sawi a, hei hi a thusawi hnuhnung ber a ni ta a ni.
A hun hnuhnung:
Rev.
J. Vanlalhnuna hi pa hrisel leh invawng tak a ni a, insawiselna pawh a
nei ngai lem lova. Kumin, 2026 April thla khan Synod Hospital,
Durtlangah Full Body check-up neiin riakin a in-admit a, April 30, 2026
khan dam takin damdawi in atangin a chhuak a.
June thla tir lam atang
khan a awm bâwrah na a neih thin thu a sawi a. Doctor hrang hrangte
râwn an nih hnuin a chuap a chak lo tih hmuh chhuah a ni a. July thla
tir lam khan Synod Hospital-ah a in check up a, a thisen te an test a,
hetah hian a allergy a sang hle tih hmuh chhuah a ni a. In lama enkawl a
nih hnuah a thawhah a reh hleih theih loh avang leh a hnungzâng na a
sawisel tak reng avangin July 21, 2026 (Thawhlehni) khan Synod Hospital
inentir leh a ni a. A thisen test atangin Heart Attack leh Thisen Cancer
(Leukemia) a nei tih hriat a ni a. Ebenezer Hospital-ah refer a ni a.
July 22, 2026 (Nilaini) khan Ebenezer Hospital-ah hian MRI te, CT Scan
leh thisente test nawn lehin, Leukemia AML a ni tih hmuh nawn leh a ni
a, ICCU-ah dah nghal a ni. Amah a harh tha a, hma pawh sawn ve hret hret
tura beisei a nih laiin July 23, 2026 chawhnu lam atang khan a zual a,
Ventilator-te nena enkawl a ni a, theihtawpa a nun chhan an tum chungin
hemi zan dar 8:50 khan a rawng a bawlsak Lalpa hnenah a chawl ta a ni.
VUINA PROGRAMME
A hmun : Bawngkawn Kohhran Biak In
A hun : July 24, 2026 (Zirtawpni) Chawhnu dar 1:00
Vuitu : Rev. John Raldosanga, Synod Moderator
Chanchin sawi : Rev. B. Zohmangaiha, Synod Secretary
Thlamuanna Thuchah : Rev. John Raldosanga, Synod Moderator
Zaipawl : Bawngkawn Kohhran Zaipawl
Tawngtaisaktu : Rev. Lalsangmuana, Synod Statistician
Hla sak ho : ‘Mi thianghlim kalna kawng hlui’ KHB No. 500
Malsawmna : Rev. Dr. K. Lallawmzuala, Finance Officer
Thlanmual
Hun hmangtu : Rev. Lalbiakhlira, Counsellor, FG&CC, Bawngkawn