SMB hnuaia Missionary Nurse-te Refresher Training
Synod Mission Board hnuaia Missionary Health Care Worker (Missionary Nurse) te tan Refresher Training 7th Batch chu August 3-28, 2026 chhung hian Youth Recreation Centre, Falkland-ah neih mek a ni a, training tur hian Nurse 14 koh an ni a, an kal kim thei a ni.
Training chhung hian thupui chi hrang hrang – Health Care Awareness, HIV/AIDS chungchang, Accountancy, Mental Health, Eye, Gynae, Ortho, Dental, Nephro chungchang leh rawngbawlna tur atana thil pawimawh hrang hrang an zir ang. Training hi thla khat awh tura ruahman a ni a, ni 3-7 chhung khan Synod Hospital, Durtlangah Practical class an kal a, ni 10-24 chhungin Theory Class an nei ang a, ni 25-ah Bukpuiah Mobile Clinic an nei ang a, ni 26-27 chhungin Civil Hospital, Aizawlah Practical Class an nei leh ang.
Synod Mission Board hnuaiah hian Missionary Nurse 132 an awm mek a, Refresher training tur hian a tah tawlin koh thin an ni.
Campus Ministry
July 30 - 31, 2026 chhung khan Govt. Darlawn Higher Secondary School-ah rawngbawlin Rev. Johny Lalremfela, Director leh Resource Person-te, Upa K. Lalengzama leh Pu Joel Lalbiakkima te an kal.
Finance
July 31, 2026 (Zirtawpni) khan Luangmual Bialah Sum Vawn dan Training neihpuiin thawktute, Upa David Lalnunfela leh Pu Clayton Malsawmkima te an kal.
Social Front
August 1, 2026 (Inrinni) khan Aibawk Bialah Ruihhlo chungchang inzirtirna Awareness Campaign neiin campaigner-te, Upa Dr. J. Malsawma, Upa H. Lalnghinglova leh Pu Alan Lalmuanpuia te an kal.
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
Pangbalkawn Bial chhunga harsat hrang hrang tawk chhungkaw panga hnenah Rs.90,000/-, Sakawrdai khuaa damlo mi pahnih hnenah Rs.20,000/-, Kawrtethawveng khuaa damlo mi pakhat hnenah Rs.10,000/-, West Bunghmuna damlo mi pakhat hnenah Rs.10,000/-, Bunghmun North-a khawsak harsa chhungkaw pakhat hnenah Rs.10,000/-, Tlangnuam Vengthlanga damlo mi pakhat hnenah Rs.10,000/-, Selam khuaa damlo mi pakhat hnenah Rs.10,000/-, N. Hlimen khuaa damlo mi pakhat hnenah Rs.10,000/-, Darlung khuaa damlo mi pakhat hnenah Rs.10,000/-, Nisapui khuaa damlo mi pakhat hnenah Rs.10,000/-, Luangpawn khuaa damlo mi pakhat hnenah Rs.10,000/- leh Falkland venga khawsak harsa chhungkaw pakhat hnenah Rs.10,000/- pek a ni.