Pathian kaihhruainain Kohhran hoten kumin 2026 Beihrual thla kan lo thleng leh ta. Kumin Beihrual thlaah hian September 1-6, 2026 chhungin 'Ramthar Hapta' hman a ni ang a, September 21 - 27, 2026 chhungin 'Kristian Chhungkaw Hapta' hman a ni ang a. September 27, 20256 (Pathianni)-ah 'Nu leh Pa Ni leh Kristian Chhungkaw Ni' hman a ni bawk ang.
Kum 1906 leh 1913-a harhna a lo thlen khan Kohhran kan pung nasa hle a. Amaherawhchu, harhna a lo thleng leh ta mai lo a. Kohhran a lo ngui leh ta a, rinna kawngah an la ngheh miau loh avangin khawvel lamah an kir leh ta teuh a ni. Rinawm taka awm hram hramte chuan ringtute intihchak nan leh ringlote beih nan beihpui thlak an duh ta a ni. Khatih hun lai khan Khasi Synod hnuaiah awmin, Mizoram hmar lam Kohhran hi Presbytery pakhat kan ni a. March thlaa inkhawmpui chuan beihrual nei turin a rel ta a, June 1918-ah beihrual chu hman a lo ni ta a ni. He beihrual avang hian Kohhrana hming pe lut thar chu 344 lai an ni a. A hlawkna an hmuh avangin October thlaa inkhawmpui chuan kum thar lamah pawh chhunzawm leh turin a rel a, September 1919-ah beihrual nei leh turin a rel ta a ni.
Beihrual hmasa ber chu June 1918-ah neih a ni a. 1919 leh 1920-ah September thlaah neiin, kum 1921-ah January thlaah; 1922, 1923 leh 1924-ah te April thlaah an nei leh a. Tuna kan hman hun September thla hi 1925 atangin a hun nghet atan hman a lo ni ta a ni.
Thupui hi 1937 atanga neih tan a ni a, 1981 atangin hapta hmasa ber hi ramthar hapta atana hman a ni a. 1983 atangin hapta hnuhnung ber hi Kristian chhungkaw hapta atan hman a ni thung. Chawlhkar tluana hman theih loh a nih chuan chawlhkhar hnuhnung ber dawttu-ah hman thin a ni.
Synod 2001-ah beihrual hman dan tihdanglam rawtna a lut a. Chu chu pawmin SEC bawh zui atan tih a ni a. SEC chuan ruahmanna hrang hrang, point 5 emaw vel a siam ta a. September thlaa hman zelte, tualchhung Kohhranin tha an tih angin Biak In leh in lama hman pawlhte, mahni Kohhran tan tangkai leh sawt zawka hmang duhte tan zau zawka zalenna pek a lo ni ta a ni.
2001 hma lam kha chuan inkaihhruaina siam angin Biak Inah hman a ni mai thin a. Hman dan phung tihdanglam a nih tak hnuah hian Kohhran thenkhat chuan Upa biala hun hmante, camping, crusade bakah Kohhran hnuaia peng hrang hrangte anmahni inkhawm huna thupui zir ve mai tura tihtein hun an hmang ta thin a ni.