Ramthar Ni
August 31 (Thawhtanni) kha Kohhran ni pawimawh Ramthar Ni a ni a, Mizorama Presbyterian Kohhran rawn dintu Rev. David Evan Jones (Zosaphluia) Mizorama rawngbawl tura a lo thlen ni a nih avangin Mizoram Presbyterian Kohhran tan ni pawimawh bik a ni. Kum 1972 Mizoram Synod Inkhawmpui chuan, Synod Ramthar Board-in, ‘August 31 Pu Zosaphluia Mizorama a lo thlen ni hi Synod Ramthar Ni atan hman ni se,’ tia a rawtna chu pawmin kum 1973 atang khan August 31 chu Ramthar Ni atan hman tan a lo ni ta a ni.
Mizoram Presbyterian Kohhran chuan kumin Ramthar Ni pual hian tum khat inkhawm atan programme a siam a, thupui inang tlang 'Hawh u, lal chhungte i va hrilh ang u' (2 Lalte 7:8-11) chu zir ho a ni.
Kohhran hoten Beihrual thla kan thleng leh ta
Pathian kaihhruainain Kohhran hoten kumin 2026 Beihrual thla kan lo thleng leh ta a, Beihrual programme hi September 1 atang khan hman tan a ni a, Beihrual chhung hian Ramthar Hapta leh Kristian Chhungkaw Hapta bakah Nilai Thupui kal zel chhunzawmna leh Pathian fak hla sak chungchang kan zir dawn a ni. September 1-6 chhung hian 'Ramthar Hapta' hman a ni a, ni 7-20 chhungin Nilai Thupui kal zel chhunzawm a ni ang a, ni 21-27 chhungin ‘Kristian Chhungkaw Hapta’ hman a ni ang a, ni 28-30 chhungin Pathian fak hla sak leh Beihrual kharnain hun hman a ni ang.
Beihrual hi kum 1918 June thla atanga hman tan a ni a. A tir lamah chuan January thlaah te, April thlaah te hman thin a ni a, kum 1925 atangin September thlaah neih thin a ni. Kum 1947 atangin Nilai Zan Thupui Bu leh Beihrual Thupui hi bu khata siam tan niin kumin hi Beihrual kan hman kum 108-na a ni.
Kohhran a lo pung zel a, Beihrual kan hman dan pawh a lo danglam ve zel a. Ringlomite beihna atan chauh ni lovin ringtute intihchakna lam te, kohhran inpumkhatna lam te, Kristian chhungkua tihchakna leh ramthar rawngbawlna lama intihsawtna lam atan pawh kan hmang ta zel a ni.
Worship
August 26-28, 2026 chhung khan Buhchangphai Bial leh Rengtekawn Kohhranah te Music Training neihpuiin T.Upa H. Lalrinmawia, Senior Instructor leh Pu T. Laldintluanga, Trainer-te an kal.
Campus Ministry
August 27-28, 2026 chhung khan Presbyterian English School, Salem vengah Crusade neiin hun an hmang a. He hunah hian kan Tv. Lalrinchhana, Counsellor bakah Resource Person pathum - Rev. Zosangliana Colney, Pu C. John Saiparliana leh Nl. Laltlankimi te an kal a, zirlai naupang te bakah Nu leh Pa pualin hun hman a ni bawk.
Finance
August 29-30, 2026 chhung khan Sakawrdai Bialah Finance Campaign neiin campaigner-te, Upa David Lalnunfela, Synod Office, Upa R. Lalbiakdika, Synod Office, Upa P.C. Vanlalrova leh Upa C. Ramtharnghaka te an kal.
Social Front
August 30, 2026 (Pathianni) khan Teenage For Christ, Bungkawn High School Veng Kohhranah Moral Reform inzirtirna neiin Rev. H. Vanlalhriata, campaigner a kal.
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
Bawngkawn East-a damlo mi pakhat hnenah Rs.10,000/-, Tuirum khuaa damlo mi pakhat hnenah Rs.10,000/-, Palsang khuaa damlo mi pakhat hnenah Rs.10,000/-, Kolasib Venglai East-a damlo mi pakhat hnenah Rs.10,000/- leh North Chawnpui khuaa damlo mi pakhat hnenah Rs.10,000/- pek a ni.