Vawiin (Sept. 10, 2026) khan Mizoram Christian College chuan Internal Quality Assurance Cell (IQAC) huaihawtin Green Commute Day ( Boruak venhim nana ke a kal ni) an hmang.
Innghahkhawmna hmun 4 - Chanmari, Israel Point, Temple leh Synod Office ah te siamin, MCC zirlai leh zirtirtu zawng zawngte chu 7 kms. kein an kal a ni. Zirlaite hian leilung venhimna leh boruak chhia tih tlemna kawnga hmalak a tulzia te, lirthei tawt leh traffic jam tih tlem a tulzia te, taksa leh rilru hrisel nana ke a kal tam a tulzia te tarlanna poster an keng bawk.
Nitin College Bus bakah lirthei tlan thin 163 a tlan tak loh avangin, College kal nana hman thin Bus leh two wheeler in 1862 kms. tlan nana a hman Diesel leh Petrol Rs. 5,850/- man vel an hum thei a ni.
MCC, Green Commute Day hun hi SHSS Hall-ah hman a ni a. IQAC Co-Ordinator Vanlalpeka, Assistant Professor, MCC chuan thu sawiin zirlaiten Green Commute Day an ti hlawhtling chu lawmawm a tih thu a sawi a, MCC Best Practices zinga mi anih avangin kumtin chhunzawm chhoh zel tur anih thu a sawi bawk.
Green Commute Day kharna hunah hian Principal Dr. Tawnenga pawhin thu a sawiin, khawvel ram danga khawlum avanga mi tam takin an tuar nasatzia a sawi a. Mizoramah pawh khaw lum chho zel te, lirthei kan hmang nasa lutuk tih tlem a tulzia te, boruak chhe zel tur venhim a tulzia te ngaihtuah chungin, kan chenna, kan chhehvel, kan environment nena inkungkaih thil a ni tih hre reng chunga hetiang kawngah hian hma la a, midangte kawhhmuhtu ni zel turin zirlaite a chah bawk.
